اسلام آباد۔24مارچ (اے پی پی):چیئرمین سینیٹ سید یوسف رضا گیلانی سے امریکی ناظم الامور نٹالی اے بیکر نے آج اسلام آباد میں ملاقات کی۔ملاقات میں دونوں ممالک کے درمیان تاریخی اور دیرینہ تعلقات پر تبادلہ خیال کیا گیا،اس دوران پاکستان اور امریکہ کے درمیان دوطرفہ تعلقات، تجارتی تعاون، سفارتی تعلقات، توانائی، موسمیاتی تبدیلی، زرعی شعبے میں شراکت داری اور سکیورٹی تعاون جیسے اہم امور زیر بحث آئے۔
چیئرمین سینیٹ سید یوسف رضا گیلانی نے کہا کہ امریکہ پاکستان کا ایک دیرینہ شراکت دار ہے اور دونوں ممالک کے تعلقات 7 دہائیوں پر محیط ہیں۔ انہوں نے کہا کہ بطور وزیر اعظم پاکستان انہوں نے 2008 میں امریکی صدر جارج بش اور 2012 میں صدر براک اوباما سے ملاقاتیں کیں، جن میں دوطرفہ تعاون کو مزید وسعت دینے پر زور دیا گیا تھا۔ سید یوسف رضا گیلانی کا مزید کہنا تھا کہ امریکہ پاکستان کی سب سے بڑی برآمدی منڈی ہے اور تجارتی تعلقات کو مزید مستحکم کرنے کی ضرورت ہے۔
چیئرمین سینیٹ نے کہا کہ پاکستان میں امریکی سرمایہ کاری کے وسیع مواقع موجود ہیں اور توانائی، بنیادی ڈھانچے اور ٹیکنالوجی کے شعبوں میں مزید امریکی سرمایہ کاری ضروری ہے۔ انہوں نے کہا کہ کاروباری ماحول کو بہتر بنانے سے دونوں معیشتوں کو فائدہ ہوگا اور ترقی کے نئے مواقع پیدا ہوں گے۔چیئرمین سینیٹ سید یوسف رضا گیلانی نے اس بات پر بھی زور دیا کہ موسمیاتی تبدیلی، توانائی اور زراعت میں باہمی تعاون کو فروغ دیا جانا چاہیے تاکہ پاکستان اور امریکہ مشترکہ طور پر جدید ٹیکنالوجی اور پائیدار ترقی کے منصوبوں پر کام کر سکیں۔
چیئرمین سینیٹ نے کہا کہ انسداد دہشت گردی میں پاکستان کی قربانیاں دنیا کے سامنے ہیں اور عالمی امن و استحکام کے لیے پاکستان کا کردار اہم ہے۔ انہوں نے کہا کہ افغانستان میں امن و استحکام کے لیے پاکستان کا کردار کلیدی حیثیت رکھتا ہے اور خطے میں امن کے لیے پاک-امریکہ تعاون وقت کی اہم ضرورت ہے۔ملاقات میں پارلیمانی سفارت کاری کو مزید فروغ دینے پر بھی اتفاق کیا گیا۔ اس کے علاوہ، بائیوٹیکنالوجی، خلائی تحقیق اور مصنوعی ذہانت کے شعبوں میں تعاون بڑھانے کے امکانات پر بھی تبادلہ خیال ہوا۔
چیئرمین سینیٹ نے کہا کہ امریکہ میں مقیم پاکستانی کمیونٹی ایک اہم اثاثہ ہے جو دونوں ممالک کے درمیان عوامی روابط کو مزید مستحکم کر سکتی ہے۔ انہوں نے کہا کہ تعلیمی اور ثقافتی تبادلوں کو فروغ دے کر دونوں ممالک کے درمیان تعلقات کو مزید وسعت دی جائے گی۔چیئرمین سینیٹ سید یوسف رضا گیلانی نے مزید کہا کہ کہا کہ پاکستان اور امریکہ کو اختراع اور اقتصادی ترقی کے نئے مواقع تلاش کرنے چاہئیں۔
انہوں نے کہا کہ جدید زراعت اور حیاتیاتی تنوع میں امریکہ کے ساتھ شراکت داری بڑھانے کی ضرورت ہے تاکہ غذائی تحفظ اور زرعی پیداوار میں بہتری لائی جا سکے۔چیئرمین سینیٹ نے کہا کہ پاکستان نے عالمی سطح پر امن و استحکام کے لیے بے شمار قربانیاں دی ہیں اور دونوں ممالک کے سفارتی مشنز ان تعلقات کو مزید مستحکم کر رہے ہیں۔
انہوں نے اس بات پر بھی زور دیا کہ موسمیاتی تبدیلی کے چیلنجز سے نمٹنے کے لیے مشترکہ اقدامات ضروری ہیں اور اس حوالے سے دونوں ممالک کے درمیان مزید تعاون بڑھایا جانا چاہیے۔ملاقات کے اختتام پر دونوں رہنماؤں نے اس عزم کا اظہار کیا کہ پاکستان اور امریکہ کے درمیان تعلقات مزید مستحکم کیے جائیں گے اور باہمی تعاون سے ترقی کے نئے مواقع پیدا کیے جائیں گے۔ دونوں ممالک کے عوام کے درمیان روابط کو مزید مستحکم کرنے اور سفارتی تعلقات میں بہتری کے لیے مسلسل رابطے جاری رکھنے پر بھی اتفاق کیا گیا۔
Short Link: https://urdu.app.com.pk/urdu/?p=575857
