اسلام آباد۔19مارچ (اے پی پی):چیئرمین سینیٹ سید یوسف رضا گیلانی نے نیشنل پریس کلب کے انتخابات میں جرنلسٹ پینل کے نومنتخب صدر اظہر جتوئی، سیکرٹری نیئر علی اور وقار عباسی کو فنانس سیکرٹری بننے پر مبارکباد پیش کی اور نو منتخب قیادت کےلئے نیک خواہشات کا اظہار کیا ہے ۔
سینیٹ سیکرٹریٹ سے جاری بیان کے مطابق چیئرمین سینیٹ نے کہا کہ نیشنل پریس کلب کے الیکشن میں نومنتخب عہدیداران کی کامیابی ان پر صحافی برادری کے بھرپور اعتماد کا مظہر ہے۔ سید یوسف رضا گیلانی نے امید ظا ہر کی کہ نیشنل پریس کلب اسلام آباد کی نومنتخب قیادت میڈیا کی ترقی اور صحافتی برادری کے اعتماد پر پورا اترنے اور ان کے مسائل کو حل کرنے کے لیے اپنی تمام ترصلاحیتوں کو بروئے کار لائے گی ۔
انہوں نے کہا کہ عوامی مسائل کو اقتدار کے ایوانوں تک پہنچانے اور ایوان میں عوام کی فلاح و بہبود کےلئے ہونے والی قانون سازی کو عوام تک پہنچانے میں صحافتی برادری کا کردار کلیدی اہمیت کا حامل ہے۔چیئرمین سینیٹ نے کہا کہ وہ پریس کلب اسلام آباد کی نومنتخب قیادت کی کامیابیوں اور کامرانیوں کے لئے دعا گو ہیں۔
Short Link: https://urdu.app.com.pk/urdu/?p=574074
