اسلام آباد۔5نومبر (اے پی پی):چیئرمین سینیٹ محمد صادق سنجرانی نے پی ٹی آئی کے سینیٹر اعظم سواتی کے بیان پر پارلیمانی لیڈرز پرمشتمل کمیٹی بنانے کااعلان کرتے ہوئے کہا ہے کہ سینیٹراعظم سواتی کا مبینہ ویڈیو سے متعلق انکشاف قابل مذمت اور افسوسناک ہے۔
یہاں جاری بیان میں صادق سنجرانی نے کہا کہ سینیٹراعظم سواتی کے انکشاف سے دلی رنج اورتکلیف پہنچی،سینیٹراعظم سواتی ایک ایماندار اور قابل عزت شخصیت کے مالک ہیں۔انہوں نے کہاکہ سینیٹر اعظم سواتی کوکوئٹہ بطور مہمان بہترین اور محفوظ ترین رہائش فراہم کی،تمام سینیٹرز بلا تفریق قابل احترام اور خاندان کی مانند ہیں،سینیٹراعظم سواتی میرے خاندان کے ممبر کی طرح ہیں،یہ بات کسی سے ڈھکی چھپی نہیں،بطورمسلمان وبلوچ اخلاقی اقدار سے بخوبی آگاہ ہوں۔
چیئرمین سینیٹ نے کہا کہ سینیٹر اعظم سواتی ایوان کے باعزت ممبر ہیں،انکی تکالیف کا ادراک ہے،سینیٹر اعظم سواتی خود اوراہلیہ تہجد گزار ہیں،انکی اہلیہ ماں کا درجہ رکھتی ہے،سینیٹراعظم سواتی میرے بڑے بھائی ہیں،انکے ساتھ خاندانی تعلقات ہیں۔صادق سنجرانی نے کہا کہ سینیٹراعظم سواتی کی ازدواجی زندگی سے متعلق وڈیو پر سینیٹ کی کمیٹی تشکیل دی جارہی ہے،پارلیمانی لیڈرز پر مشتمل کمیٹی میں تمام جماعتوں کے رہنما شامل ہونگے،کمیٹی اعظم سواتی کی وڈیو بنانے اور لیک کرنے کا جائزہ لیکر رپورٹ مرتب کرے گی،کمیٹی اپنی رپورٹ مرتب کرکے ایوان میں پیش کرے گی۔
