اسلام آباد۔2ستمبر (اے پی پی):چیئرمین سینیٹ سید یوسف رضا گیلانی نے صوبہ خیبر پختونخوا کے ضلع بنوں میں فرنٹیئر کور (ایف سی) ہیڈ کوارٹر پر ہونے والے دہشت گرد حملے کو ناکام بنانے والے جوانوں کو بھرپور خراج تحسین پیش کیا ہے۔منگل کو سینٹ سیکرٹریٹ سے جاری کردہ بیان کے مطابق انہوں نے اس بہادری کو قوم کے حوصلوں کی بلندی اور مادرِ وطن کے دفاع کے لیے لازوال قربانیوں کا عکاس قرار دیا۔چیئرمین سینیٹ نے دہشت گردوں کی بزدلانہ کارروائی کی شدید الفاظ میں مذمت کرتے ہوئے کہا کہ ایف سی کے نڈر اور جانثار سپوتوں نے اپنی جانوں کے نذرانے پیش کر کے ملک دشمن عناصر کے ناپاک عزائم کو خاک میں ملا دیا۔ ان کا کہنا تھا کہ پوری قوم اپنی بہادر افواج اور سیکورٹی فورسز کے شانہ بشانہ کھڑی ہے اور دہشت گردوں کے خلاف جنگ میں ان کے عزم و قربانیوں پر فخر کرتی ہے۔
انہوں نے کہا کہ بنوں میں ایف سی ہیڈ کوارٹر پر حملہ دراصل فتنۂ خوارج کی ایک اور ناکام کوشش تھی، جسے جوانوں کی جرات، حوصلے اور عزم نے ناکام بنا دیا۔ گیلانی نے کہا کہ دہشت گرد اپنے مذموم عزائم میں کبھی کامیاب نہیں ہو سکتے کیونکہ پاکستانی قوم اور فورسز ان کے خلاف سیسہ پلائی دیوار کی طرح ڈٹی ہوئی ہیں۔چیئرمین سینیٹ نے کہا کہ حملے میں چھ بہادر سپوتوں نے مادرِ وطن کی حفاظت کرتے ہوئے جامِ شہادت نوش کیا اور اپنی جانوں کا نذرانہ پیش کر کے پوری قوم کے سر فخر سے بلند کر دیے۔ انہوں نے کہا کہ شہداء کی قربانیاں رائیگاں نہیں جائیں گی بلکہ یہ قربانیاں ہمارے عزم کو مزید مضبوط کرتی ہیں۔انہوں نے شہداء کے لواحقین سے دلی ہمدردی کا اظہار کرتے ہوئے کہا کہ سینیٹ اور پوری قوم غم کی اس گھڑی میں ان کے ساتھ ہے۔ انہوں نے دعا کی کہ اللہ تعالیٰ شہداء کے درجات بلند فرمائے اور لواحقین کو صبرِ جمیل عطا کرے۔
