اسلام آباد ۔ 15 اپریل (اے پی پی) چیئرمین سینیٹ محمد صادق سنجرانی نے کہا ہے کہ پاکستان سعودی عرب کے ساتھ تعلقات کو قدر کی نگاہ سے دیکھتا ہے، پاکستان اور سعودی عرب تاریخی ، ثقافتی ، مذہبی رشتوں میں بندھے ہوئے ہیں، مشکل وقت میں ساتھ دینے پر سعودی عرب کے شکر گزار ہیں۔ ان خیالات کا اظہارانہو ں نے پیر کو پارلیمنٹ ہاؤس میں امام کعبہ ڈاکٹر عواد الجہانی سے ملاقات میں گفتگو کرتے ہوئے کیا۔ ملاقات کے دوران قائد ایوان سینیٹ شبلی فراز ، قائد حزب اختلاف راجہ ظفرالحق ، اعظم سواتی ، سجاد طوری ، مولا بخش چانڈیو اور دلاور خان شریک تھے۔ اس موقع پر چیئرمین سینیٹ محمد صادق سنجرانی نے کہاکہ خطے اور بین الاقوامی امور پر ایک جیسا نقطہ نظر دوطرفہ تعلقات کو مزید تقویت دیتا ہے۔ سعودی ولی عہد کے حالیہ دورے پر باہمی تعاون کا ایک نیا باب کھول دیا ہے۔ انہوں نے کہا کہ دو ہزار سے زائد قیدیوں کی رہائی پر شکر گزار ہیں۔حجاج کے کوٹہ میں اضافہ خوش آئند ہے۔ سعودی سرمایہ کاری سے پاکستان میں ترقی و خوشحالی کا نیا دور شروع ہوگا۔ چیئرمین سینیٹ نے کہا کہ پاکستان اور سعودی عرب کے مابین تجارتی عدم توازن کو ختم کرنے کی ضرورت ہے۔ امام کعبہ کا دورہ انتہائی اہم ہے۔ پیغام اسلام کانفرنس نے دنیا کو امن کا پیغام دیا۔ دہشت گردی کو اسلام کے ساتھ منصوب کرنا ایک سوچی سمجھی سازش ہے۔چیئرمین سینیٹ محمد صادق سنجرانی نے کہاکہ اسلام امن ، اخوت ، برداشت کی تعلیم دیتا ہے۔ چیئرمین سینیٹ نے امام کعبہ کو ایوان بالا کے کام کرنے کے طریقہ کار سے آگاہ کیا۔ انہوں نے کہا کہ شریعت اور اسلامی امور سے متعلق قانون سازی میں اسلامی نظریاتی کونسل سے مشاورت کی جاتی ہے۔حالیہ پاک بھارت کشیدگی میں سعودی ولی عہد کا کردار قابل ستائش ہے۔ اس موقع پر شبلی فراز نے کہاکہ امام کعبہ کی پاکستان میں تشریف آوری ملک وقوم کے لیے برکت اور خوشی کا باعث ہے۔ کعبہ سے نسبت کے مقابلے میں زمینی عہدوں کی اہمیت نہیں۔ انہوں نے کہاکہ پاکستان اور سعودی عرب کا رشتہ ہر مشکل میں مزید مستحکم ہوا ہے۔ راجہ ظفر الحق نے کہا کہ سعودی عرب سے عقیدت ہمارے تعلقات کے استحکام کا باعث ہے۔ کوئی دوسرا ملک سعودی عرب کے برابر نہیں ہوسکتا۔ ملاقات کے دوران امام کعبہ شیخ عبداللہ عواد الجہانی نے کہاکہ پاکستان اسلامی دنیا کی بہت بڑی قوت ہے۔پاکستان اور سعودی عرب کی سلامتی ایک دوسرے سے منسلک ہے۔ امام کعبہ نے کہا کہ ہم ایک دوسرے سے کٹ کر نہیں رہ سکتے۔ پاکستان کی اہمیت اور پاکستانیوں کی محبت کے پیش نظر یہاں کی عوام سے ملنا ہم پر واجب ہے۔ انہوں نے کہاکہ سعودی ولی عہد کا دورہ اس بات کا غماز ہے کہ ہم پاکستان کو کتنی اہمیت دیتے ہیں۔ سعودی عرب اور پاکستان امت مسلمہ کے مسائل کے حل کے لیے مشترکہ جدوجہد کر رہے ہیں۔ امام کعبہ نے کہا کہ پاکستان اور سعودی عرب عالم اسلام کء وہ مشترکہ قوت ہیں جو ہر سازش کا مقابلہ کرنے کی صلاحیت رکھتے ہیں۔
