اسلام آباد۔22فروری (اے پی پی):چیئرمین سی ڈی اے محمد علی رندھاوا سے اے ڈی بی کے وفد نے سی ڈی اے ہیڈکوارٹرز میں ملاقات کی، ملاقات میں اسلام آباد انٹر سٹی بس ٹرمینل کے قیام سمیت مختلف منصوبوں پر تبادلہ خیال کیا گیا۔ ہفتہ کو سی ڈی اے کی جانب سے جاری بیان کے مطابق چیئرمین سی ڈی اے محمد علی رندھاوا کو بریفنگ دیتے ہوئے بتایا گیا کہ اسلام آباد انٹر سٹی بس ٹرمینل کی ابتدائی فزیبلٹی رپورٹ مکمل کرلی گئی ہے۔ انہیں مزید بتایا گیا کہ اسلام آباد انٹر سٹی بس ٹرمینل منصوبے کو بی آر ٹی بس سروس اور الیکٹرک بسوں کے ساتھ منسلک کیا جائے گا۔
چیئرمین سی ڈی اے محمد علی رندھاوا نے کہا کہ اسلام آباد انٹر سٹی بس ٹرمینل کے قیام کے حوالے سے اے ڈی بی فنانشل ماڈل تیار کرے۔مزید بریفنگ دی گئی کہ انٹر سٹی بس ٹرمینل منصوبے میں چارجنگ انفراسٹرکچر بھی قائم کیا جائے گا۔چیئرمین سی ڈی اے محمد علی رندھاوا نے کہا کہ اے ڈی بی اسلام آباد ٹرانسپورٹ ماسٹر پلان کی تیاری اور ماحول دوست منصوبوں کے لئے کاربن کریڈٹ حاصل کرنے کے لئے اپنی تکنیکی مدد فراہم کرے۔ ملاقات کے اختتام پر چیئرمین سی ڈی اے نے اے ڈی بی کے ساتھ مل کر اسلام آباد شہر کی تعمیر وترقی کے لئے مل کر کام کرنے کے عزم کا اعادہ بھی کیا۔
Short Link: https://urdu.app.com.pk/urdu/?p=564757
