اسلام آباد۔22مئی (اے پی پی):چیئرمین سی ڈی اے، چیف کمشنر اسلام آباد و ڈی جی سول ڈیفنس محمد علی رندھاوا کی زیر صدارت سی ڈی اے ہیڈکوارٹرز اسلام آباد میں اہم اجلاس منعقد ہوا جس میں ممبر ایڈمن، ممبر اسٹیٹ ،ممبر انوائرمنٹ، ڈی جی انوائرمنٹ، ڈی جی ریسورس، آرکیٹیکٹ اور متعلقہ افسران کی شرکت کی۔اجلاس میں شہریوں کے لیے ایف نائن پارک میں سٹیٹ آف دی آرٹ لائبریری ، سیاحت سے متعلقہ منصوبوں کے قیام کے حوالے سے تبادلہ خیال کیا گیا ۔
اجلاس میں پبلک لائبریری کے قیام کے حوالے سے ڈیزائن اور متعلقہ سہولیات پر بریفنگ دی گئی۔چیئرمین سی ڈی اے نے پبلک لائبریری کے ڈیزائن کو بین الاقوامی معیار کے مطابق تیار کرنے کی ہدایت کی ۔چیئرمین سی ڈی اے محمد علی رندھاوا نے کہا کہ اسلام آباد شہر میں انٹرنیشنل سٹینڈرڈ کے مطابق تمام ڈیجیٹل سہولیات کے ساتھ لیس سٹیٹ آف دی آرٹ پبلک لائبریری کا قیام عمل میں لایا جائے،پبلک لائبریری کو تمام جدید سہولیات سے مزین کیا جائے تاکہ لائبریری آنے والے شہریوں کو کسی بھی قسم کی مشکلات کا سامنا نہ کرنا پڑے، پبلک لائبریری میں بچوں کو مطالعہ کے ساتھ پلے ایریا اور تفریحی سہولیات بھی میسر کی جائیں گی۔
چیئرمین سی ڈی اے نے لائبریری کے ڈیزائن میں ڈیجیٹل اور ای لائبریری کی تمام سہولیات میسر کرنے کی ہدایت کی۔چیئرمین سی ڈی اے نے پبلک لائبریری کو قومی اور بین الاقوامی لائبریریوں سے ڈیجیٹلی منسلک کرنے کی ہدایت بھی کی۔انہوں نے کہا کہ اسلام آباد کے شہریوں کیلئے پبلک لائبریری کی ممبر شپ کی سہولیات کی فراہمی کو یقینی بنایا جائے،بین الاقوامی معیار کے مطابق لائبریری کی تعمیر کا قیام عمل میں لایا جائے،پبلک لائبریری میں ڈیجیٹل انڈیکس، سوشل زون اور کو-ورکنگ سپیسز کی سہولیات بھی ہوں گی، پبلک لائبریری میں مختلف ایونٹس کے انعقاد کے لئے کانفرنس ہالز کی جگہ بھی ہوگی۔
چیئرمین سی ڈی اے نے پبلک لائبریری میں جدید ترین ریسرچ سینٹر اور لیب کی سہولیات بھی تعمیر کرنے کی ہدایت کی ۔سیاحت سے متعلق منصوبے میں ایف نائن پارک میں تھیم پارک اور سفاری پارک کی تعمیر اور گالف کلب کے حوالے سے تبادلہ خیال کیاگیا۔ اسلام آباد میں سٹیٹ آف دی آرٹ نرسری کی اپ گریڈیشن کے حوالے سے کام جاری ہے۔
Short Link: https://urdu.app.com.pk/urdu/?p=600302
