کراچی۔17جنوری (اے پی پی):چیئرمین وزیراعظم یوتھ پروگرام رانا مشہود احمد خان سے پاکستان کے نوجوانوں میں تعاون اور سرمایہ کاری کےزیادہ سے زیادہ مواقع فراہم کرنے کیلئے اوورسیز انویسٹرز چیمبر آف کامرس اینڈ انڈسٹری کی قیادت نے ملاقات کی ۔ملاقات میں مستقبل کے حوالے سے اہم امور پر تبادلہ خیال کیا گیا۔ دوران ملاقات پاکستان کو بیرون ملک سرمایہ کاری کا مرکز بنانے کے طریقوں پر توجہ مرکوز کی گئی اور نوجوانوں میں انٹرپرینیورشپ اور ہنر مندی کو فروغ دینے کے اہم نکات پر تبادلہ خیال کیا گیا۔
شرکاء نے پاکستان کے نوجوانوں کی صلاحیتوں کو بروئے کار لانے اور طویل مدتی اقتصادی ترقی کو آگے بڑھانے کے لئے سرکاری اور نجی شعبوں کے درمیان مضبوط شراکت داری کی ضرورت پر زور دیا۔ ملاقات کے دوران اظہار خیال کرتے ہوئے رانا مشہود احمد خان نے پاکستان کی معیشت کو تقویت دینے میں اوورسیز چیمبر کے کردار کو سراہا۔ انہوں نے کہا کہ ہمارے نوجوانوں کو بااختیار بنانا ہمارے ملک کے مضبوط، خوشحال مستقبل کی تعمیر کے لئے ضروری ہے۔
اوورسیزچیمبرز جیسے شراکت داروں کے ساتھ ہم ایسے مواقع اور ماحول پیدا کر سکتے ہیں جو ہمارے نوجوانوں کو ترقی کی منازل طے کرنے کے قابل بنائے۔ انہوں نے کہا کہ پرائم منسٹر زیوتھ پروگرام ان اقدامات میں سرفہرست رہا ہے جس کا مقصد ملک کے نوجوانوں کو تعلیم، پیشہ وارانہ تربیت اور اور باعزت روزگار کے ذریعے ترقی دینا ہے۔
اوورسیزچیمبرکے وفد کے ساتھ یہ ملاقات ملک کی متحرک، نوجوان آبادی کی مدد کے لئے عالمی مہارت اور سرمایہ کاری لا کر ان کوششوں کو وسعت دینے کے لئے ایک نئے عزم کا اظہار ہے۔ملاقات میں اوورسیز چیمبر کے چیف ایگزیکٹو اور سیکرٹری جنرل عبدالعلیم اور ایگزیکٹو ڈائریکٹر کاشف شفیع شامل تھے۔