اسلام آباد۔9مارچ (اے پی پی):چیئرمین پرائم منسٹر یوتھ پروگرام رانا مشہود احمد خان نے "کلائمیٹ ان مائی کمیونٹی” مقابلے کے فاتحین کو وزیراعظم آفس میں مدعو کیا، یہ تقریب ان کی تخلیقی صلاحیتوں اور موسمیاتی تبدیلی کے بارے میں بیداری پیدا کرنے کی کوششوں کا جشن منانے کے لیے خاص طور پر منعقد کی گئی۔
پرائم منسٹر یوتھ پروگرام کی جانب سے جاری اعلامیہ کے مطابق ہفتے کے آغاز پر 6 مارچ کو اسلام آباد میں برطانوی ہائی کمیشن کی طرف سے دولت مشترکہ کے دن کے موقع پر منعقدہ ایک خصوصی افطار تقریب میں جیتنے والوں کو اعزاز سے نوازا گیا۔
تقریب کا انعقاد برٹش ہائی کمیشن نے برٹش کونسل اور آواز II کے اشتراک سے کیا تھا۔ مقابلہ میں پاکستان بھر سے نوجوانوں کی حوصلہ افزائی کی گئی کہ موسمیاتی تبدیلی کے حوالہ سے اپنے خیالات پر مبنی آرٹ ورک جمع کرائیں، مقابلہ میں 550 سے زیادہ افراد شامل ہوئے اور چھ شاندار فاتحین کا انتخاب کیا گیا۔برٹش ہائی کمیشن کی افطار تقریب میں مقابلہ جیتنے والوں کو اپنے فن کا مظاہرہ کرنے کا موقع ملا اور ان کی تخلیقی صلاحیتوں کو مختلف معززین بشمول رانا مشہود احمد خان کی موجودگی میں منایا گیا۔
مقابلہ کے فاتحین کی لگن اور ان کے فن کے اثرات سے متاثر ہو کر رانا مشہود نے جیتنے والوں کو 7 مارچ کو وزیراعظم آفس میں ملاقات کی دعوت دی۔اپنے دورے کے دوران رانا مشہود نے تخلیقی اظہار کے ذریعے ماحولیاتی تبدیلیوں سے نمٹنے کے لیے ان کی غیر معمولی صلاحیتوں اور عزم کی تعریف کی۔ انہوں نے ماحولیاتی وکالت میں نوجوانوں کی شمولیت کی اہمیت اور پائیدار ترقی میں قائدانہ کردار ادا کرنے کے لیے نوجوانوں کو بااختیار بنانے کی ضرورت پر زور دیا۔ان کی شاندار خدمات کے اعتراف میں چیئرمین یوتھ پروگرام مشہود نے موسمیاتی تبدیلی کے چھ چیمپئنز کو گرین یوتھ موومنٹ (جی وائی ایم) کے سفیروں کے طور پر نامزد کرنے کا اعلان کیا۔
انہوں نے اس بات پر روشنی ڈالی کہ انہیں بطور سفیر مقرر کر نے کا مقصد انہیں ایک پلیٹ فارم فراہم کرنا ہے تاکہ وہ اپنی آواز کو بلند کر سکیں اور پاکستان بھر کے نوجوانوں کو بامعنی آب و ہوا کی کارروائی میں شامل کر سکیں۔
انہوں نے امید ظاہر کی کہ ان کی قیادت دوسروں کو سرسبز اور پائیدار مستقبل کی تعمیر میں فعال حصہ لینے کی ترغیب دے گی۔نئے تعینات ہونے والے جی وائی ایم سفیروں نے اس نئی ذمہ داری کے لیے اظہار تشکر اور جوش و خروش کا اظہار کیا، اپنا کام جاری رکھنے کا فیصلہ کیا اور اپنے ساتھیوں کو سرسبز مستقبل کے لیے اقدامات کرنے کی ترغیب دی۔
پرائم منسٹرز یوتھ پروگرام ان قابل ذکر نوجوان افراد کے ساتھ مسلسل تعاون کا منتظر ہے اور ان کے کام کو آگے بڑھانے کے لیے ضروری تعاون فراہم کرنے کے لیے پرعزم ہے۔
