اسلام آباد ۔ 8 ستمبر (اے پی پی) پاکستان الیکٹرانک میڈیا ریگولیٹری اتھارٹی (پیمرا) کے چیئرمین محمد سلیم بیگ نے غیر اخلاقی مواد اور انڈین چینلز کے خلاف قانون کے مطابق سخت کارروائی کرنے کی ہدایت دیتے ہوئے کہا ہے کہ تمام وسائل بروئے کار لاتے ہوئے غیر اخلاقی، بیہودہ اور انڈین چینلز کی کیبل ٹی وی پر ترسیل کے خاتمے کو یقینی بنائیں۔ وہ پیمراریجنل آفس کراچی کے دورہ کے موقع پر گفتگو کر رہے تھے۔ ریجنل جنرل منیجراشفاق جمانی نے چیئرمین پیمرا کو کراچی ریجنل آفس کی جانب سے غیر اخلاقی مواد اور انڈین چینل کے خلاف کارروائیوں سے آگاہ کیا۔ چیئرمین پیمرا نے ان ہاو¿س سی ڈی چینلز پر، فحش اورغیر اخلاقی مواد نشر کرنے والوں کے خلاف سخت ترین کارروائی کرنے کا حکم بھی دیا۔ مزید برآں کیبل آپریٹرز کو یو ٹیوب یا کسی بھی غیر قانونی ذرائع سے غیر قانونی مواد نشر کرنے پر فوری کارروائی کرنے پر زور دیا۔ چیئرمین پیمرا نے پیمرا شکایات کونسل سندھ کے چیئرپرسن پروفیسر ڈاکٹر طاہر مسعوداور ممبران ڈاکٹر محمد عاصم، ڈاکٹر فوزیہ ناز،محترمہ دردانہ تنویر، سید سکندر علی اور جناب مکیش کمار سے ملاقات بھی کی۔ چیئرمین پیمرا نے کونسل کی گراں قدر خدمات کو سراہا اور تمام کونسل ممبران کو الیکٹرانک میڈیا کی بہتری اور فروغ کے لئے مثبت اور مو¿ثر کردار ادا کرنے پر زور دیا۔ چیئرمین پیمرا نے کونسل ممبران کو عوامی شکایات کی جلد شنوائی کر کے سفارشات اتھارٹی کو بھجوانے کی تلقین کی۔چیئرمین پیمرا محمد سلیم بیگ نے ناظرین کی طرف سے ڈراموں میں دکھائے جانے والے موضوعات، معاشرتی، سماجی، اخلاقی اور مذہبی اقدار کے منافی مواد پرشکایات پر اسٹیک ہولڈرز سے مشاورت کے لیے پاکستان براڈ کاسٹرز ایسوسی ایشن ، یونائیٹڈپروڈیوسرز ایسوسی ایشن اور پاکستان ایڈورٹائزنگ سوسائٹی کے عہدیدران سے بھی ملاقاتیں کیں۔ پاکستان براڈ کاسٹرز ایسوسی ایشن نے انٹرٹینمنٹ چینلز پر مشتمل ایک کمیٹی تشکیل دی جو پیمرا کے ساتھ مشاورت سے سفارشات مرتب کرے گی۔
