چیئرمین (پی سی بی) محسن نقوی کا آئی سی سی ویمنز ورلڈ کپ کوالیفائر میں شریک ٹیموں اور آفیشلز کے اعزاز میں عشائیہ

لاہور۔13اپریل (اے پی پی):چیئرمین پاکستان کرکٹ بورڈ (پی سی بی) محسن نقوی کی جانب سے آئی سی سی ویمنز ورلڈ کپ کوالیفائر میں شریک 6 ممالک کی خواتین کرکٹ ٹیموں اور آفیشلز کے اعزاز میں شاہی قلعہ لاہور میں شاندار تقریب کا انعقاد کیا گیا۔تقریب میں میزبان پاکستان کے علاوہ بنگلہ دیش، ویسٹ انڈیز، آئرلینڈ، اسکاٹ لینڈ اور تھائی لینڈ کی خواتین کھلاڑیوں، کوچنگ و مینجمنٹ اسٹاف اور آفیشلز نے شرکت کی۔ چیئرمین پی سی بی محسن نقوی نے شاہی قلعہ کے عالمگیری دروازے پر مہمان ٹیموں کا پرتپاک استقبال کیا اور ان سے فردا فردا ملاقات کی۔ اس موقع پر گروپ فوٹو بھی بنایا گیا۔اس موقع پر محسن نقوی نے کہا کہ پاکستان آنے والی تمام ٹیموں کا زندہ دلان لاہور میں خیرمقدم کرتے ہیں اور آپ سب ہمارے خصوصی مہمان ہیں۔ پاکستان پر امن ۔ محفوظ اور کرکٹ کے کھیل سے محبت کرنے والا ملک ہے۔

امید ہے کہ زندہ دلوں کے شہر میں آپ کا قیام خوشگوار اور یادگار رہے گا۔ تقریب میں روایتی شاہی انداز اپنایا گیا جہاں دربانوں اور مغلیہ لباس میں ملبوس کینزوں نے مہمانوں کا فرشی آداب کے ساتھ استقبال کیا۔ دیوان خاص میں مغلیہ دور کی جھلک پیش کی گئی، جس میں بادشاہ سلامت کی آمد اور کتھک رقص نے غیر ملکی مہمانوں کو خوب محظوظ کیا۔ ڈھولچی گروپ کی پرفارمنس اور بانسری کی مدھر دھنوں نے سماں باندھ دیا، جبکہ غیر ملکی خواتین کھلاڑی بھی رقص میں شامل ہو گئیں۔ مہمانو ں کوشاہی قلعہ، بادشاہی مسجد، مزار اقبال، حضوری باغ اور شیش محل سمیت مختلف تاریخی مقامات کی سیر کرائی گئی۔ رنگیلا رکشہ کی سواری نے مہمانوں کو خوب محظوظ کیا۔ خواتین کھلاڑیوں اور آفیشلز نے شاہی قلعہ کی تاریخی حیثیت میں گہری دلچسپی کا اظہار کیا۔تقریب کے اختتام پر شاندار عشائیہ دیا گیا۔

غیر ملکی مہمانوں نے پی سی بی کا شکریہ ادا کرتے ہوئے تقریب کو یادگار اور ناقابل فراموش قرار دیا۔ ان کا کہنا تھا کہ لاہور سے خوبصورت اور خوشگوار یادیں لے کر جا رہے ہیں۔تقریب میں امریکی قونصل جنرل کرسٹن کے ہاکنز، پی سی بی کے چیف آپریٹنگ آفیسر سمیر احمد، چیف فنانشل آفیسر جاوید مرتضی، ہیڈ آف ویمنز کرکٹ رافعہ حیدر، ڈائریکٹر انٹرنیشنل کرکٹ عثمان واہلہ، ڈائریکٹر ڈومیسٹک کرکٹ عبداللہ خرم نیازی، ڈائریکٹر ایچ آر فیصل ملک سمیت دیگر اعلی حکام نے بھی شرکت کی۔

Short Link: https://urdu.app.com.pk/urdu/?p=581431