راولپنڈی ۔ 25 اکتوبر (اے پی پی)چیف آف آرمی سٹاف جنرل قمر جاوید باجوہ نے جمعرات کو سرپیر اور پانڈو سیکٹرز میں کنٹرول لائن کا دورہ کیا اور پاک فوج کے جوانوں سے ملاقات کی۔ انہوں نے آپریشنل تیاریوں اور ان کے بلند مورال کو سراہا۔ جمعرات کو آئی ایس پی آر سے جاری ہونے والے بیان کے مطابق آرمی چیف نے کہا کہ پاک فوج علاقائی امن اور استحکام پر مکمل یقین رکھتی ہے۔ انہوں نے کہا کہ ہم مادر وطن کے خلاف کسی بھی قسم کی مہم جوئی کا دفاع کرنے کے لئے تیار ہیں۔ انہوں نے کہا کہ کشمیر ایک بنیادی نامکمل ایجنڈا ہے اور ہم کشمیریوں کے منصفانہ، تاریخی موقف پر ان کے ساتھ ہیں۔
