اسلام آباد ۔ 4 اگست (اے پی پی) قومی ائیر لائن (پی آئی اے ) کی انتظامیہ کی جانب سے طیارہ حادثہ کے شہداءکے لواحقین کو ایک کروڑ فی مسافر ادائیگی کا اعلان کیا گیا ہے۔ ترجمان پی آئی اے کی طرف سے منگل کو یہاں جاری اعلامیہ کے مطابق پی آئی اے کے چیف ایگزیکٹو افسر (سی ای او) ائیر مارشل ارشد ملک کے انشورنس کمپنی کے ساتھ مذاکرات کامیاب ہو گئے ہیں جس کے بعد انشورنس کی رقم کی ادائیگی کا فیصلہ کیا گیا ہے۔ ترجمان نے بتایا کہ اس سے قبل تمام لواحقین کو پچاس لاکھ روپے ادا کئے جانے تھے جو کیرج بائی ائیر ایکٹ 2012 کے مطابق تھے۔ انشورنس کی رقم میں اضافہ سی ای او پی آئی اے ائیر مارشل ارشد ملک کی ذاتی کاوشوں کا نتیجہ ہے۔ وفاقی وزیر ہوابازی غلام سرور خان کی جانب سے سی ای او پی آئی اے کو خصوصی ہدایات دی گئی تھیں کہ جلد از جلد لواحقین کو معاوضہ کی ادائیگی کو یقینی بنایا جائے۔ ترجمان نے کہا کہ اب تمام مسافروں کے قانونی ورثاءکو ایک کروڑ روپے فی مسافر انشورنس کی مد میں ادا کئے جائیں گے۔ ترجمان نے کہا کہ اس سے قبل پی آئی اے دس لاکھ روپے فی مسافر جنازے اور تدفین کے زمرے میں پہلے ہی ادا کر چکی ہے۔ بڑھائی گئی انشورنس رقم پہلے سے ادا کی گئی رقم کے علاوہ ہے۔ ترجمان کے مطابق پی آئی اے نے اس سلسلے میں کام مکمل کرلیا ہے اور اب اسے قانونی ورثاءکی جانب سے جانشینی سرٹیفیکیٹ کا انتظار ہے، اس سلسلے میں ورثاءکو خطوط ارسال کئے جارہے ہیں۔
