لاہور۔26فروری (اے پی پی):آئی سی سی چیمپئنز ٹرافی کے آٹھویں میچ میں افغانستان نے سنسنی خیز مقابلے کے بعد انگلینڈ کو 8 رنز سے شکست دے کر ٹورنامنٹ سے ہی باہر کردیا۔قذاقی اسٹیڈیم میں کھیلے گئے میچ میں افغانستان نے ابراہیم زدران کی 177رنز کی شاندار اننگز کی بدولت پہلے بیٹنگ کرتے ہوئے مقررہ 50اوورز میں 7وکٹوں کے نقصان پر 325رنز بنائے۔ہدف کے تعاقب میں انگلینڈ کی ابتدائی وکٹیں جلد گری تاہم جوروٹ کی سنچری کی بدولت میچ انتہائی دلچسپ رہا تاہم وہ اپنی ٹیم کو میچ نہیں جتواسکے اور پوری انگلش ٹیم آخری اوور میں 317رنز پر آئوٹ ہوگئی۔
انگلینڈ کی جانب سے اننگز کا آغاز کرنے والے فل سالٹ صرف 12رنز بنانے کے بعد عظمت اللہ عمرزئی کا شکار بن گئے جب کہ جیمی اسمتھ بھی 9رنز ہی بناسکے۔آسٹریلیا کے خلاف ریکارڈ اننگز کھیلنے والے بین ڈکٹ بھی 38 رنز بنانے کے بعد راشد خان کے ہاتھوں آئوٹ ہوگئے جب کہ ہیری بروکس کو 25 رنز پر محمد نبی نے پویلین واپس بھیج دیا۔انگلش بیٹر جو روٹ ایک اینڈ سے وکٹ پر ڈٹے رہے، انہوں نے اپنی نصف سنچری کو سنچری میں تبدیل کیا، تاہم وہ میچ ختم کرنے سے پہلے 46ویں اوور میں 111 گیندوں پر 120رنز بنانے کے بعد آئوٹ ہوگئے، ان کی اننگز میں ایک چھکا اور 11چوکے شامل تھے۔کپتان جوز بٹلر 42گیندوں پر 38رنز کی اننگز کھیلنے کے بعد آئوٹ ہوئے جب کہ لیام لیونگ اسٹون صرف 10رنز کے مہمان ثابت ہوئے، جیمی اورٹن 32 اور جوفرا آرچر 14 رنز بناسکے۔
افغانستان کی جانب سے عظمت اللہ عمرزئی نے 5، محمد نبی نے 2 جب کہ فضل الحق فاروقی، راشد خان اور گلبدین نائب نے ایک ایک وکٹ حاصل کی۔افغانستان نے اننگز کا آغاز کیا تو میچ کے چوتھے اوور کی پہلی گیند پر اوپنر رحمن اللہ گرباز 6 رنز بنانے کے بعد جوفرا آرچر کی گیند پر کلین بولڈ ہوگئے جب کہ اسی اوور کی پانچویں گیند پر صدیق اللہ اتل 4رنز بناکر ایل بی ڈبلیو ہوگئے۔افغانستان کی تیسری وکٹ بھی جوفرا آرچر کے حصے میں آئی جب 37رنز کے مجموعی اسکور پر رحمت شاہ 4 رنز بنانے کے بعد راشد خان کے ہاتھوں کیچ آئوٹ ہوگئے۔تاہم، ابتدائی 3 وکٹیں جلد گرنے کے باوجود افغان ٹیم پریشر میں نہیں آئی اور ابراہم زدران نے کپتان حشمت اللہ شاہدی کے ساتھ ملکر 103رنز کی شراکت قائم کی۔
شاہدی 3چھکوں اور ایک چوکے کی مدد سے 41رنز بناکر عادل رشید کاشکار بنے۔عظمت اللہ عمر زئی نے 31گیندوں پر 3چھکے اور ایک چوکے کی مدد سے 41رنز کی اننگز کھیلی جب کہ محمد نبی نے بھی 24گیندوں پر 40رنز کی جارحانہ اننگز کھیلی جس میں 3چھکے اور 2چوکے شامل تھے۔اننگز کا آغاز کرنے والے ابراہیم زدران 50ویں اوور کی پہلی گیند پر آئوٹ ہوئے،
انہوں نے نہ صرف ون ڈے کریئر کی چھٹی سنچری مکمل کی بلکہ وہ 146 گیندوں پر 177رنز کی یادگار اننگز کھیل کر آئوٹ ہوئے جس میں 6 چھکے اور 12 چوکے شامل تھے۔انگلینڈ کی جانب سے جوفرا آرچر نے 3، لیام لیونگ اسٹون نے 2، جمی اوورٹن اور عادل رشید نے ایک، ایک وکٹ حاصل کی۔
Short Link: https://urdu.app.com.pk/urdu/?p=566900
