بیجنگ ۔31اگست (اے پی پی):چینی صدر شی جن پنگ سے2025 شنگھائی تعاون تنظیم کے سربراہ اجلاس میں شرکت کے لئے چین کے شہر تیان جن میں موجود آرمینیا کے وزیر اعظم نیکول پشین یان نے ملاقات کی،دونوں رہنماؤں نے چین اور آرمینیا کے درمیان سٹریٹجک شراکت داری کے قیام کا اعلان کیا۔ چینی میڈیا کے مطابق شی جن پنگ نے نشاندہی کی کہ چین اور آرمینیا کے درمیان دوستی وقت کے ساتھ ساتھ مضبوط ہوتی جارہی ہے۔
فریقین کو مشترکہ طور پر اعلیٰ معیار کے حامل”بیلٹ اینڈ روڈ” کی تعمیر کرنی چاہئے تاکہ دونوں ممالک کے عوام کو مزید فوائد پہنچائے جائیں۔انہوں نے کہا کہ چین شنگھائی تعاون تنظیم میں آرمینیا کی شمولیت کی حمایت کرتا ہے اور حقیقی کثیر الجہتی پر عمل کرنے کے لئے آرمینیا کے ساتھ مل کر کام کرنے کا خواہاں ہے۔
وزیر اعظم نیکول پشین یان نے کہا کہ سٹریٹجک شراکت داری کے قیام سے آرمینیا چین تعلقات کو اعلیٰ سطح پر فروغ ملے گا۔ آرمینیا چین کے ساتھ اقتصادی و تجارتی تعاون کو وسعت دینے، بین الاقوامی اور علاقائی امور میں قریبی تعاون برقرار رکھنے اور دوطرفہ تعلقات کو مزید فروغ دینے کا خواہاں ہے۔
