بیجنگ ۔31اگست (اے پی پی):چینی صدر شی جن پنگ سے شنگھائی تعاون تنظیم کے سربراہ اجلاس کے موقع پر بیلاروس کے صدر الیگزینڈر لوکاشینکو نے ملاقات کی ۔ چینی میڈیا کے مطابق اس موقع پر شی جن پنگ نے کہا کہ چین اور بیلاروس کے درمیان جامع اسٹریٹجک شراکت داری اعلیٰ سطح پر ترقی کر رہی ہے ،دونوں فریقوں کو مرکزی مفادات اور بڑے خدشات سے متعلق امور پر ایک دوسرے کی مضبوطی سے حمایت جاری رکھنی چاہیے، ہمیں اعلی معیار کے ساتھ مشترکہ طور پر "بیلٹ اینڈ روڈ” کی تعمیر ، ترقیاتی حکمت عملیوں کی ہم آہنگی کی مضبوطی اور تعاون کے نئے امکانات کی جستجو جاری رکھنی چاہیئے۔
انہوں نے کہا کہ ہمیں شنگھائی تعاون تنظیم، برکس سمیت دیگر کثیر الجہتی میکانزم کے تحت مل کر کام کرنا ہوگا تاکہ انسانیت کے ہم نصیب معاشرے کی تعمیر کو فروغ دیا جاسکے۔ لوکاشینکو نے کہا کہ کوئی بھی طاقت چین کی ترقی اور احیا کو نہیں روک سکتی۔ بیلاروس چین کا شراکت دار اور ہمیشہ قابل اعتماد دوست ہے۔ بیلاروس تمام شعبوں میں چین کے ساتھ عملی تعاون کو گہرا کرنے اور دوطرفہ تعلقات کو مزید فروغ دینے کے لئے تیار ہے۔
