بیجنگ۔ 25ستمبر(اے پی پی) چینی وزارت تجارت کے ترجمان گائو فینگ نے کہا کہ چین بدستور امریکہ سمیت مختلف ممالک کے سرمایہ کاروں کے لیے سرمایہ کاری کا ایک مثالی اور ترجیحی مقام ہے۔انہوں نے ایک پریس کانفرنس میں کہا کہ موجودہ عالمی معیشت تنزلی کا شکار ہے اور عالمی سطح پر سرحد پار سرمایہ کاری بھی شدید متاثرہوئی ہے،اس کے باوجود چین میں غیر ملکی سرمائے کی آمد اور غیر ملکی سرمایہ کاری کے استعمال کا رجحان مجموعی طور پر مستحکم رہا ہے۔ یو ایس چائنہ بزنس کونسل کے ایک حالیہ جائزے کا حوالہ دیتے ہوئے انہوں نے بتایا کہ سروے میں شریک 83 فیصد کمپنیاں بدستور چین کو دنیا میں سب سے اہم منڈی میں شمار کرتی ہیں ، جو چینی مارکیٹ پر غیر ملکی سرمایہ کاروں کے اعتماد کا بھر پوراظہار ہے۔ انہوں نے مزید کہا کہ چین تجارتی ماحول کو بہتر بنائے گا اور مختلف ممالک کے سرمایہ کاروں کے ساتھ چین کے ترقیاتی مواقع شیئر کرے گا۔
