اسلام آباد۔14اکتوبر (اے پی پی):چائنا انٹرنیشنل پریس کمیونیکیشن سینٹر کے ریسرچ فیلو محمد ضمیر اسدی نے کہا ہے کہ چین پاکستان اقتصادی راہداری کے دوسرے مرحلہ کے لئے چینی وزیراعظم کا دورہ پاکستان اہمیت کا حامل ہے،چین کے صنعتی، کاروباری اور تجارتی حلقوں کے لئے سی پیک فیز 2 میں بے شمار مواقع موجود ہیں۔ ان خیالات کا اظہا رانہوں نے اے پی پی سے گفتگو کرتے ہوئے کیا ۔انہوں نے کہاکہ چین پاکستان اقتصادی راہداری (سی پیک) کے دوسرے مرحلے کے لیے چینی وزیراعظم کا دورہ پاکستان انتہائی اہمیت رکھتا ہے۔
ان کے مطابق یہ دورہ سی پیک کے فیز 2 میں نئے مواقع پیدا کرنے کے حوالے سے اہم کردار ادا کر سکتا ہے، جس میں صنعتی، کاروباری، اور تجارتی شعبے شامل ہیں۔انہوں نے کہا کہ سی پیک کا بنیادی مقصد پاکستان میں صنعتی ترقی، زراعت کی بہتری، اور اقتصادی ڈھانچے کی مضبوطی ہے، جس سے دونوں ممالک کے درمیان اقتصادی تعلقات مزید مستحکم ہوں گے۔
اس دورے کے دوران چینی کاروباری اور صنعتی حلقے پاکستان میں سرمایہ کاری کے امکانات کا جائزہ لیں گے، جس سے روزگار کے مواقع پیدا ہوں گے اور پاکستان کی معیشت کو فروغ ملے گا۔انہوں نے کہاکہ یہ دورہ نہ صرف اقتصادی تعاون کو بڑھانے کا باعث بنے گا بلکہ پاکستان اور چین کے درمیان مضبوط دوستی اور باہمی اعتماد کی بھی علامت ہے، جو خطے میں امن اور ترقی کے لیے اہم ہے۔
