چین کا اسرائیل سے غزہ میں فوجی کارروائیاں فوری روکنے کا مطالبہ

اقوام متحدہ ۔28اگست (اے پی پی):اقوام متحدہ میں چین کے نائب مستقل نمائندے گینگ شوانگ نے اسرائیل سے مطالبہ کیا ہے کہ وہ غزہ میں جاری فوجی کارروائیاں فوری طور پر بند کرے۔ شنہوا کے مطابق انہوں نے کہا کہ غزہ میں تقریباً 2 ملین افراد انسانی بحران کا شکار ہیں، جبکہ روزانہ درجنوں بے گناہ جانیں ضائع ہو رہی ہیں۔

انہوں نے کہا کہ تشدد سے امن ممکن نہیں اور چین تمام شہریوں کو نشانہ بنانے، بین الاقوامی قوانین کی خلاف ورزی اور انسانی امداد کی راہ میں رکاوٹوں کی مذمت کرتا ہے۔ انہوں نے اسرائیل پر زور دیا کہ وہ تمام بارڈر کراسنگ کھولے اور اقوام متحدہ کو مکمل امدادی رسائی دے۔چین نے دو ریاستی حل کی حمایت دہراتے ہوئے عالمی برادری سے مطالبہ کیا کہ وہ فوری جنگ بندی اور انسانی بحران کے خاتمے کے لیے عملی اقدامات کرے۔