بیجنگ ۔16اپریل (اے پی پی):چین نے ایئرلائنز کو امریکی کمپنی بوئنگ سے جہازوں کی ڈلیوری روکنے کا حکم دےدیا ۔ بلوم برگ کے مطابق جنوری میں امریکی صدر ڈونلڈ ٹرمپ کے عہدہ سنبھالنے کے بعد دنیا کی دو بڑی معیشتیں ٹیرف کے معاملے پر حالت جنگ میں ہیں۔ امریکا نے چین کی درآمدات پر 145 فیصد ٹیرف لگایا ہے۔چین نے اس پر ردعمل دیتے ہوئے امریکی مصنوعات پر 125 فیصد ٹیرف لاگو کیا ہے۔
بلوم برگ کی رپورٹ کے مطابق چین نے ایئرلائنز کو یہ حکم بھی دیا ہے کہ وہ بوئنگ طیاروں کی ڈلیوری بند کر دیں۔ یہ بھی کہا ہے کہ امریکا سے جہازوں کے پرزوں کی خریداری بھی بند کر دیں۔امریکی درآمدات پر بیجنگ کے جوابی ٹیرف ممکنہ طور پر ہوائی جہاز اور پرزہ جات لانے کی لاگت میں نمایاں اضافہ کر سکتے ہیں۔
بلومبرگ نے کہا کہ چینی حکومت ایسے کیریئرز کی مدد کرنے پر غور کر رہی ہے جو بوئنگ جیٹ طیاروں کو لیز پر دیتے ہیں اور زیادہ اخراجات کا سامنا کرتے ہیں۔امریکی صدر ڈونلڈ ٹرمپ کے ٹیرف لاگو کرنے کے فیصلے نے عالمی مارکیٹس کو ہلا کر رکھ دیا ہے اور اتحادیوں اور مخالفین کے ساتھ سفارت کاری کو یکساں طور پر متاثر کیا ہے۔
ڈونلڈ ٹرمپ نے گذشتہ ہفتے ٹیرف پر مزید اضافہ روکنے کا اعلان کیا تھا لیکن بیجنگ کو فوری طور پر کوئی مہلت نہیں دی تھی۔امریکی حکام نے جمعے کو چین اور دیگر ممالک کے لیے سمارٹ فونز، سیمی کنڈکٹرز اور کمپیوٹرز جیسی اشیا پر ڈیوٹی سے استثنیٰ کا اعلان کیا۔
Short Link: https://urdu.app.com.pk/urdu/?p=582558
