بیجنگ ۔21اگست (اے پی پی):چین کی تیار کردہ انسان بردار ہوائی کشتی نے اپنی پہلی بین الصوبائی فیری فلائٹ کامیابی سے مکمل کر لی ۔شنہوا نیوز نے ایوی ایشن انڈسٹری کارپوریشن آف چائنا (اے وی آئی سی) کے حوالے سے بتایا ہے کہ چین کے آزادانہ طور پر تیار کردہ ’’اے ایس-700‘‘سول انسان بردار ہوائی کشتی نے بدھ کو اپنی پہلی بین الصوبائی پرواز مکمل کر لی ۔چینی معروف طیارہ ساز کمپنی اے وی آئی سی نے کہا کہ بین الصوبائی فیری پرواز کے دوران فضائی کشتی نے تقریباً 1,000 کلومیٹر سے زیادہ کا فاصلہ طے کیا ۔
کمپنی کے مطابق اے ایس-700 نے منگل کی صبح وسطی چین کے صوبہ ہوبی کے جنگ مین کے ایک ہوائی اڈے سے اڑان بھری اور مقامی ہوائی اڈوں پر دو سٹاپ اوور کے ساتھ پڑوسی صوبہ ہنان کے اوپر سے اڑ تے ہوئے بدھ کو دوپہر کے وقت بحفاظت جنوبی چین کے گوانگشی ژوانگ کے علاقے گیلن پہنچ گئی۔ بین الصوبائی فیری پرواز کے سفر کے دوران اس کی پرواز کا کل وقت 12 گھنٹے اور 44 منٹ رہا، جس میں پرواز کی اونچائی 500 سے 1,990 میٹر اور رفتار 60 سے 80 کلومیٹر فی گھنٹہ تھی۔
اے وی آئی سی سپیشل وہیکل ریسرچ انسٹی ٹیوٹ کی طرف سے تیار کردہ،اے ایس-700ایک قسم کا سنگل کیپسول انسان بردار ہوائی کشتی یا ائر شپ ہے، جس میں ایک پائلٹ سمیت 10 افراد کو لے جانے کی زیادہ سے زیادہ گنجائش ہے۔اس کا زیادہ سے زیادہ ٹیک آف وزن 4,150 کلوگرام، زیادہ سے زیادہ پرواز کی حد 700 کلومیٹر اور زیادہ سے زیادہ 10 گھنٹے کی برداشت ہے۔
