بیجنگ۔12مارچ (اے پی پی):چین نے پاکستان کے صوبہ بلوچستان میں جعفر ایکسپریس پر دہشت گرد حملے کی شدید مذمت کی ہے۔ چینی وزارت خارجہ کی ترجمان ماو ننگ نے بدھ کو معمول کی بریفنگ کے دوران دہشت گردی سے نمٹنے، یکجہتی اور سماجی استحکام کو برقرار رکھنے اور شہریوں کے تحفظ کے لئے پاکستان کی بھرپور حمایت جاری رکھنے کے عزم کا اظہار کیا۔
انہوں نےٹرین پر حملے کے حوالے سے سوال کے جواب میں کہا کہ ہم نے رپورٹس کو نوٹ کیا اور اس دہشت گردحملے کی شدید مذمت کی۔ انہوں نے کہا کہ چین کسی بھی شکل میں دہشت گردی کی سختی سے مخالفت کرتا ہے ۔ انہوں نے مزید کہا کہ ہم دہشت گردی سے نمٹنے، یکجہتی اور سماجی استحکام کو برقرار رکھنے اور شہریوں کے تحفظ کے لئے پاکستان کی مضبوطی سے حمایت جاری رکھیں گے۔
انہوں نے مزید کہا کہ چین پاکستان کے ساتھ انسداد دہشت گردی اور سکیورٹی تعاون کو مضبوط بنانے اور خطے کو پرامن، محفوظ اور مستحکم رکھنے کےلئےتیار ہے۔
Short Link: https://urdu.app.com.pk/urdu/?p=571508
