بیجنگ۔22نومبر (اے پی پی):چین کی ٹیلی مواصلات کی صنعت کے کاروبار میں رواں سال جنوری سے اکتوبر تک مسلسل اضافہ ریکارڈ کیا گیا ہے۔چینی میڈیا کے مطابق چین کی وزارت صنعت و انفارمیشن ٹیکنالوجی کے اعداد و شمار سے ظاہر ہوتا ہے کہ رواں سال اکتوبر تک چین کے ٹیلی مواصلات کے کاروبار کے حجم میں اضافہ ہوا ہے اور ٹیلی مواصلات کے مجموعی کاروباری حجم میں سال بہ سال 16.6فیصد کا اضافہ ریکارڈ کیا گیا ۔
ٹیلی مواصلات کے کاروبار میں 207.7 بلین یوآن کا منافع حاصل ہوا ہے اور ترقی کی شرح میں جنوری سے ستمبر تک 3.8 فیصد پوائنٹس کا اضافہ دیکھنے میں آیا ہے۔ رواں سال اکتوبر کے اختتام تک چین میں کل 3.215 ملین فائیو جی بیس اسٹیشن استعمال میں لائے گئے ، جو چین میں موبائل بیس اسٹیشنز کی کل تعداد کا 28.1فیصد ہے اور فی 10،000 افراد پر فائیو جی بیس اسٹیشنوں کی تعداد 22.8 تک پہنچ گئی ہے۔
فائیو جی موبائل فون صارفین کی تعداد 754 ملین رہی جو گزشتہ سال کے اختتام کے مقابلے میں 194 ملین کا اضافہ ہے۔ آئی او ٹی اور فائیو جی ایپلی کیشنز کے لحاظ سے چین کی تین بنیادی ٹیلی کام کمپنیز نے 2.256 ارب موبائل آئی او ٹی صارفین تیار کیے جو کل عالمی صارفین کا تقریبا 70 فیصد ہیں ۔
