گلگت ۔7دسمبر (اے پی پی):ڈائریکٹر جنرل سکولز گلگت بلتستان فیض اللہ خان لون نے گورنمنٹ گرلز ہائر سیکنڈری سکول بونجی میں منعقدہ سالانہ تقریب تقسیم انعامات میں خصوصی شرکت کی۔ انہوں نے نمایاں کارکردگی کا مظاہرہ کرنے والی طالبات میں انعامات تقسیم کئے۔تقریب سے خطاب کرتے ہوئے ڈائریکٹر جنرل فیض اللہ خان لون نے طالبات کی حوصلہ افزائی کی ،ان کی کامیابیوں کو سراہا اور ان کے والدین کو مبارکباد پیش کی۔ انہوں نے طالبات کو مبارکباد دیتے ہوئے کہا کہ وہ گلگت بلتستان کا مستقبل ہیں
انہوں نے طالبات کو سخت محنت کرنے اور اپنے خوابوں کو پورا کرنے کی ترغیب دی۔ انہوں نے اساتذہ کی خدمات کو سراہتے ہوئے کہا کہ وہ معاشرے کے معمار ہیں۔انہوں نے گلگت بلتستان میں تعلیم کے معیار کو بہتر بنانے کے لیے حکومت کی کوششوں پر بھی روشنی ڈالی۔ انہوں نے بتایا کہ حکومت تعلیمی اداروں میں سہولیات فراہم کرنے، اساتذہ کی تربیت اور نصاب کو جدید بنانے کے لیے اقدامات کر رہی ہے۔ انہوں نے کہا کہ والدین کو اپنے بچوں کی حوصلہ افزائی کرنی چاہیے اور ان کی تعلیمی سرگرمیوں میں فعال کردار ادا کرنا چاہیے۔
