اسلام آباد۔27جون (اے پی پی):ڈائریکٹوریٹ آف ورکرز ایجوکیشن(ڈی ڈبلیو ای) کے ڈائریکٹر جنرل رائے محمد اکبر نے پاکستان سمیت دنیا کے مختلف ممالک میں بسنے والے پاکستانی مزدور طبقے کو ہیٹ ویو سے بچنے کے لئے ایڈوائزری جاری کر دی، مزدور طبقہ براہ راست دھوپ ، اینٹوں کے بھٹوں، بوائلر، تندوروں پر کام کرنے والے اپنے سروں کوسفید کپڑے سے ڈھانپ کے رکھیں،گلے سڑے پھلوں اور سبزیوں کے استعمال سے گریز کریں۔
اپنے ویڈیو پیغام میں ڈی جی ڈی ڈبلیو ای رائے محمد اکبر کا کہنا تھا کہ ڈائریکٹوریٹ آف ورکرز ایجوکیشن وفاقی وزارت سمندر پار پاکستانیز و ترقی انسانی وسائل کا ذیلی ادارہ ہے جو نہ صرف پاکستان میں ورکرز تربیت فراہم کرتا ہے بلکہ دنیا کے مختلف ممالک میں بطور مزدور کام کرنے والوں کے بنیادی حقوق کا تحفظ اور دوران کام حفاظت سے متعلق تربیت بھی یقینی بناتا ہے۔ انہوں نے بتایا کہ ڈی ڈبلیو ای نے ورکرز کو ہیٹ ویو سے بچانے کے لئے ایڈوائزری جاری کر دی ہے۔
تمام مزدور طبقے کو تنبیہ کی گئی ہے کہ وہ براہ راست دھوپ میں کام کے دوران سروں کو سفید کپڑے سے ڈھانپ کے رکھیں۔ دوران کام زیادہ سے زیادہ پانی کا استعمال کریں۔ جہاں تک ممکن ہو سکے کوشش کریں کہ اپنا کام ٹھنڈے اوقات میں مکمل کیا جائے۔پینے کے پانی میں لیموں اور معمولی سا نمک بھی ڈالیں۔ ایڈوائزری میں کہا گیا ہے کہ گرم ماحول میں کام کرنے والے بالخصوص تندور پر کام کرنے والے، اینٹوں کے بھٹوں، فیکٹریوں ،بوائلرز اور صنعتوں میں کام کرنے والے ورکر پانی کا استعمال زیادہ کریں اور تمام حفاظتی تدابیر اختیار کریں۔ شدید گرم موسم میں اگلے سڑے پھلوں ،سبزیاں کھانے سے اجتناب کریں۔
