اسلام آباد۔11ستمبر (اے پی پی):وزیر اعظم کی معاون خصوصی سینیٹر ڈاکٹر ثانیہ نشتر نے کہا ہے کہ پاکستان نے کوویڈ 19 پر اپنے ردعمل کے حوالے سے خطے کے دیگر ممالک کے مقابلے میں بہت بہتر کارکردگی کا مظاہرہ کیا ہے، انہیں "لنچ ٹائم پلینری: پاکستان میں کوویڈ 19″ میں تقریر کے لیے مدعو کیا گیا تھا۔ ڈاکٹر ثانیہ نے پاکستان کے تجربے سے سیکھئے گئے اسباق کا اشتراک کیا۔
ان خیالات کا اظہار انہوں نے سکول آف پبلک ہیلتھ اینڈ سنٹر فار کنٹیمپریری ساؤتھ کے براون یونیورسٹی میں کوویڈ 19 اور جنوبی ایشیا کے حوالے سے ایک روزہ کانفرنس کے انعقاد کے موقع پر کیا۔ جنوبی ایشیا کے اسپیکرز بشمول پاکستان ، بنگلہ دیش ، سری لنکا اور انڈیا کے افراد نے بھی ورچوئلی طور پر کانفرس میں شرکت کی۔
دیگر مقررین نے براؤن یونیورسٹی، ییل یونیورسٹی اور ہارورڈ یونیورسٹی ، اور سول سوسائٹی کی تنظیموں نے شرکت کی۔”لنچ ٹائم پلینری: پاکستان میں کوویڈ 19” کانفرنس کے بعد ڈاکٹر ثانیہ ، براؤن اور ہارورڈ کے مقررین کے مابین گفتگو بھی ہوئی۔
اس موقع پر خطاب کرتے ہوئے ڈاکٹر ثانیہ نشتر نے کہا ، "پاکستان نے کوویڈ 19 پر اپنے ردعمل کے حوالے سے خطے کے دیگر ممالک کے مقابلے میں بہت بہتر کارکردگی کا مظاہرہ کیا، پاکستان کی اب تک کی کامیابی کئی عوامل کی وجہ سے ہوئی ہے ، جن میں اعلی سطحی سیاسی توجہ اور ضروری کارروائی کے لیے حمایت؛ ایک بہت محتاط توازن ، صحت بمقابلہ روزی کی نگرانی اور خود وزیر اعظم کی سربراہی میں ، پوری حکومت اور پورے معاشرے کو متحرک کرنا ، اور کثیر الجہتی ہم آہنگی کے لیے ادارہ جاتی نقطہ نظر شامل ہیں۔
نیشنل کمانڈ اینڈ کنٹرول سنٹر کی قیادت میں کارروائیوں کے لیے فیصلہ سازی اور جوابدہی ، حکومت کی پوری طاقت کا استعمال ، معاشی اقدامات اور احساس ایمرجنسی کیش کی شکل میں امداد کے بڑے پیکج نے کامیابی میں اہم کردار ادا کیا۔ تاہم ، ہم فی الحال چوتھی لہر کا سامنا کر رہے ہیں ، اس لیے مطمئن ہونے کی کوئی گنجائش نہیں ہے۔حال ہی میں ، پاکستان کو وبائی امراض کے موثر انتظام کے لحاظ سے دنیا بھر میں تیسرا بہترین درجہ دیا گیا ہے۔
اس کے علاوہ ، ورلڈ بینک کے مطابق ، احساس ایمرجنسی کیش آبادی کے تناسب کے لحاظ سے تیسرا سب سے بڑا پروگرام تھا ، اور COVID-19 کے باعث معاش سے متاثرہ افراد کو نقد رقم کی فراہمی کی رفتار کے لحاظ سے عالمی سطح پر سب سے تیز تھا۔
ایس ایم ایس پر مبنی درخواست کے طریقہ کار کے لحاظ سے احساس کا تجربہ COVID-19 ویکسینیشن میکانزم کی تعمیر کے لیے بہت اہم تھا۔ "احساس ایس ایم ایس کی پہچان 8171 ہے جبکہ COVID-19 ویکسینیشن سسٹم 1166 ہے”کانفرنس نے ملکی ردعمل میں مختلف حالتوں پر توجہ مرکوز کی۔ وبائی بیماری نے تمام ممالک کو متاثر کیا ، لیکن نتائج نمایاں طور پر مختلف تھے۔
کچھ ممالک میں مصائب کافی زیادہ تھے ۔ دیگر مقررین نے اس بات پر زور دیا کہ حکومتی پالیسیاں ، صحت عامہ کے نظام کی طاقت ، شہریوں کو متحرک کورنا ، ویکسین کی دستیابی اور انتظامیہ سبھی مختلف طریقوں سے اہم ہیں۔
ہمیں یہ سمجھنے کی ضرورت ہے کہ یہ مختلف عوامل ، اور ممکنہ طور پر دوسرے ، مل کر ان نتائج کو پیدا کرتے ہیں جو ہم نے اب تک مشاہدہ کیا ہے۔پاکستان نے ویکسین کی 65.5 ملین سے زائد خوراکیں لگائی ہیں۔ 21 ملین سے زائد افراد کو مکمل طور پر ویکسین دی گئی ہے ، اور سال کے اختتام تک تقریبا 70 ملین افراد کو ویکسین لگانے کا ہدف ہے۔
