اسلام آباد۔6مئی (اے پی پی):وفاقی وزیر موسمیاتی تبدیلی اور ماحولیاتی رابطہ ڈاکٹر مصدق ملک نے منگل کو یہاں نیشنل ڈیزاسٹر مینجمنٹ اتھارٹی (این ڈی ایم اے) کے زیر اہتمام منعقدہ "دوسری پاکستان ایکسپو برائے آفات سے بچائو” کا افتتاح کیا اور پاکستان کے آفات سے بچائو اور موسمیاتی ریزیلینس کے لیے مضبوط عزم کا اعادہ کیا۔ ڈاکٹر مصدق ملک نے سفیروں، پارلیمنٹیرینز، اقوام متحدہ کے نمائندگان، انسانی ہمدردی کے اداروں، ماہرین تعلیم اور نجی شعبے کے رہنمائوں پر مشتمل شرکا سے خطاب کرتے ہوئے پاکستان کے آفات سے نمٹنے میں قائدانہ کردار کا ذکر کیا اور کہا کہ پاکستان دنیا کے موسمیاتی لحاظ سے سب سے زیادہ متاثرہ ممالک میں شامل ہے۔
وفاقی وزیر نے کہا کہ یہ ایکسپو پاکستان کے اس غیر متزلزل عزم کی عکاسی کرتا ہے کہ ہم ابتدائی وارننگ سسٹمز، مقامی سطح کے ردعمل کے طریقہ کار اور بین الاقوامی تعاون کے ذریعے آفات سے نمٹنے کی صلاحیتوں کو مضبوط بنائیں گے۔ پاکستان نے چیلنجز کو مواقع میں بدل کر این ای او سی جیسے مقامی ادارے تشکیل دیئے اور علاقائی شراکت داروں کے ساتھ تکنیکی مہارت کا تبادلہ کرکے خیر سگالی اور سفارتی اثر و رسوخ حاصل کیا۔ وفاقی وزیر نے 2022ء کے تباہ کن سیلاب جیسی موسمیاتی آفات کے اثرات کا ذکر کرتے ہوئے سول و عسکری اداروں، این جی اوز اور ترقیاتی شراکت داروں کی مشترکہ کاوشوں کو سراہا۔
انہوں نے موسمیاتی مالیاتی معاونت اور کاربن مارکیٹوں تک رسائی کے لیے عالمی تعاون کی ضرورت پر بھی زور دیا تاکہ پاکستان کے گلیشیئرز، خوراک اور آبی وسائل کو محفوظ بنایا جاسکے۔ ڈاکٹر مصدق ملک نے کہا کہ پیچیدہ حالات میں آفات سے نمٹنے کے لیے ایک ثقافتی طور پر حساس، اعداد و شمار پر مبنی اور مقامی کمیونٹی کو شامل کرنے والا نقطہ نظر ناگزیر ہے۔
انہوں نے قومی تھنک ٹینک کے قیام اور بین الاقوامی تعلیمی اداروں سے علم کے تبادلے کے لیے این ڈی ایم اے کے اقدام کو سراہا۔ وفاقی وزیر نے کہا کہ پاکستان کا 2030ء تک لچکدار نظام کا وژن جدت، ادارہ جاتی ہم آہنگی اور شواہد پر مبنی فیصلوں پر منحصر ہے۔ انہوں نے عالمی عطیہ دہندگان سے اپیل کی کہ وہ پاکستان کی موافقتی اور تخفیفی حکمت عملیوں کی حمایت کو اپنی ترجیح بنائیں۔
Short Link: https://urdu.app.com.pk/urdu/?p=593280
