اسلام آباد ۔ 16 جولائی (اے پی پی) ڈپٹی چیئرمین سینیٹ سلیم مانڈوی والا نے وادی نیلم اور اس کے مضافات میں سیلاب کے باعث ہونے والے جانی و مالی نقصان پر افسوس کا اظہار کیا ہے۔ انہوں نے حکومتی اداروں اور خاص طور پر این ڈی ایم اے پر زور دیا ہے کہ وہ سیلاب زدہ علاقوں میں امدادی کارروائیاں تیز کرتے ہوئے لوگوں کی جان و مال کے تحفظ اور ان کا وہاں سے بحفاظت انخلاءیقینی بنائے اور ساتھ ہی متاثرین کو تمام سہولیات باہم پہنچائی جائیں۔ انہوں نے کہا کہ سیلاب کے باعث ہونے والے نقصان پر پوری قوم رنجیدہ ہے اور ہم غمزدہ خاندانوں کے ساتھ مشکل کی اس گھڑی میں ساتھ کھڑے ہیں۔ ڈپٹی چیئرمین سینیٹ نے زخمیوں کو طبی امداد کی فوری طور پر فراہمی پر بھی زور دیا اور کہا کہ اس بحران سے نکلنے کیلئے ادارے آپس میں معاونت کو مزید بہتر بنائیں اور کسی بھی ست روی کا مظاہرہ نہ کیا جائے۔
