اسلام آباد۔22فروری (اے پی پی):ڈپٹی چیئرمین سینیٹ سیدال خان سے مختلف وفود نے اسلام آباد میں ملاقاتیں کیں، ملاقات کرنے والوں میں بلوچستان سے تعلق رکھنے والے سینئر صحافیوں کے وفد اور برطانیہ کی گلوچیسٹر یونیورسٹی کے فیکلٹی ممبران شامل تھے،ملاقات کے دوران ملک کی ترقی میں نوجوانوں کے کردار، صحافت کی آزادی اور بین الاقوامی تعلیمی تعاون کے فروغ جیسے اہم موضوعات پر تبادلہ خیال کیاگیا۔
سینیٹ سیکرٹریٹ کے میڈیا ڈائریکٹوریٹ کے مطابق سیدال خان نے بلوچستان سے تعلق رکھنے والے سینئر صحافیوں کے وفد سے ملاقات کے دوران آزاد اور ذمہ دار صحافت کے فروغ پر زور دیا،انہوں نے ملاقات میں قومی و بین الاقوامی معاملات، میڈیا کے کردار اور آزادی صحافت کی اہمیت پر تفصیلی روشنی ڈالی۔ انہوں نے کہا کہ آزاد، ذمہ دار اور مثبت صحافت کسی بھی جمہوری معاشرے کے استحکام کی بنیاد ہے،میڈیا ریاست کا چوتھا ستون ہے، جو نہ صرف عوام کو باخبر رکھتا ہے بلکہ جمہوری اقدار کے استحکام میں بھی اہم کردار ادا کرتا ہے۔ ملاقات کے دوران صحافیوں نے قومی امور سے متعلق مختلف سوالات کیے، جن کے تفصیلی جوابات دیے گئے۔
سیدال خان نے واضح کیا کہ حکومت میڈیا کی آزادی پر مکمل یقین رکھتی ہے اور صحافت کے فروغ کے لیے ہر ممکن تعاون فراہم کرتی رہے گی۔ انہوں نے میڈیا کو درپیش چیلنجوں اور ان کے حل پر بھی گفتگو کی اور اس بات پر زور دیا کہ صحافت کو ذمہ داری اور سچائی پر مبنی ہونا چاہیے تاکہ عوام تک درست معلومات پہنچ سکیں۔ ڈپٹی چیئرمین سینیٹ نے کہا کہ بلوچستان پاکستان کے روشن مستقبل کی ضمانت اور سنٹرل ایشیا کے لئے تجارت اور سرمایہ کاری کا گیٹ وے ہے۔ بلوچستان قدرتی وسائل کی دولت سے مالا مال ہے۔
انہوں نے کہا کہ موجودہ حکومت اتحادی جماعتوں کے ساتھ مل کر ملک کی معاشی صورتحال کی بہتری اور خاص طور پر بلوچستان کے عوام کے لیے بہتر حکمت عملی اختیار کر رہی ہے ،وہ وقت دور نہیں جب بلوچستان کے پسماندہ علاقوں کو ترقی کی جانب گامزن کر دیا جائے گا،بلوچستان معدنیات اور قدرتی وسائل کی دولت سے مالامال ہے ضرورت اس امر کی ہے کہ ان وسائل کو موثر استعمال میں لایا جائے۔ اقتصادی راہداری کے منصوبوں سے بلوچستان عنقریب معاشی حب کے طور پر سامنے آئے گا، بلوچستان رقبے کے لحاظ سے پاکستان کا سب سے بڑا صوبہ ہے اور یہاں سرمایہ کاری کے وسیع مواقع موجود ہیں ،ان کو موثر استعمال میں لا کر عوام اور علاقے کی خوشحالی کو یقینی بنایا جا سکتا ہے ۔
بعد ازاں ڈپٹی چیئرمین سینیٹ سیدال خان سے برطانیہ کی گلوچیسٹر یونیورسٹی کی پروفیسر عدیلہ شفیع اور ریجنل منیجر واجد علی نے پارلیمنٹ ہاؤس میں ملاقات کرتے ہوئے تعلیمی تعاون اور پارلیمانی نظام پر تبادلہ خیال کیا ۔ ملاقات کے دوران برطانیہ میں مسلم کمیونٹی کی فلاح و بہبود، تعلیم اور سماجی ترقی کے حوالے سے تبادلہ خیال کیا گیا۔پروفیسر عدیلہ شفیع نے برطانیہ میں مسلم کمیونٹی کے لیے جاری مختلف فلاحی اور تعلیمی منصوبوں پر روشنی ڈالی اور بتایا کہ گلوچیسٹر یونیورسٹی طلبہ کے لیے تعلیمی مواقع فراہم کرنے کے ساتھ ساتھ ان کی سماجی ترقی میں بھی معاونت کر رہی ہے۔
انہوں نے پاکستان اور برطانیہ کے تعلیمی اداروں کے درمیان تعاون کو مزید فروغ دینے پر زور دیا۔ریجنل منیجر واجد علی نے پاکستانی کمیونٹی کی ترقی کے لیے کیے جانے والے اقدامات کے حوالے سے بریفنگ دی اور پاکستانی طلبہ کے لیے برطانیہ میں تعلیمی مواقع کے فروغ بارے آگاہ کیا ۔ سیدال خان نے وفد کا خیر مقدم کرتے ہوئے ان کی کاوشوں کو سراہا اور کہا کہ تعلیم اور سماجی بہبود کے شعبے میں تعاون سے نہ صرف پاکستانی طلبہ بلکہ پوری مسلم کمیونٹی کو فائدہ ہوگا۔ انہوں نے پاکستان اور برطانیہ کے درمیان تعلیمی اور ثقافتی روابط کو مزید مضبوط بنانے کی ضرورت پر زور دیا اور اس ضمن میں ہر ممکن تعاون کی یقین دہانی کرائی۔
Short Link: https://urdu.app.com.pk/urdu/?p=564823
