ڈیرہ غازی خان ۔ 21 مارچ (اے پی پی):ڈیرہ غازی خان پولیس نے خوارجی دہشت گردوں کے عزائم ایک بار پھر خاک میں ملا دیے، ڈیرہ غازی خان کی پنجاب خیبرپختونخوا بارڈر چیک پوسٹ لکھانی پر رواں ماہ کا پانچواں حملہ ناکام بنا دیا گیا۔ سرکاری ذرائع کے مطابق پنجاب پولیس نے کے پی کے بارڈر چیک پوسٹ لکھانی پر دہشت گردوں کے ایک اور حملے کو پسپا کر دیا، سحری کے وقت 10 سے 12 دہشت گرد تین اطراف سے چیک پوسٹ پر حملہ آور ہوئے جنہوں نے راکٹ لانچرز اور دیگر بھاری اسلحہ کا استعمال کیا۔
پولیس جوانوں کی الرٹنس اور تھرمل امیج کیمروں کی مدد سے دہشت گردوں کی بروقت نشاندہی کر لی گئی۔ جوانوں کی بھرپور جوابی کارروائی کے باعث دہشت گرد چیک پوسٹ کے قریب نہ پہنچ سکے۔ دو گھنٹے تک مقابلہ جاری رہنے کے بعد دہشت گرد بھاری نقصان اٹھا کر فرار ہو گئے۔ رواں ماہ میں سرحدی چوکی لکھانی پر یہ پانچواں بڑا حملہ پسپا کیا گیا۔
آر پی او ڈیرہ غازی خان کیپٹن (ر) سجاد حسن خان نے آپریشن کی مکمل کمانڈ کی ڈی پی او ڈیرہ غازی خان سید علی کی زیر کمانڈ کیو آر ایف ٹیمیں بروقت لکھانی چوکی پہنچیں۔ سرحدی علاقے میں پولیس اور دیگر قانون نافذ کرنے والے اداروں کا سرچ آپریشن جاری ہے۔اس حوالے سے آئی جی پنجاب ڈاکٹر عثمان انور نے دہشت گردوں کا مردانہ وار مقابلہ کرنے والے جوانوں کو خراج تحسین پیش کیا۔
Short Link: https://urdu.app.com.pk/urdu/?p=575166
