فیصل آباد۔ 08 اپریل (اے پی پی):ضلع میں ڈینگی کے خلاف متعلقہ محکموں کے انسدادی و حفاظتی اقدامات میں کوتاہی برداشت نہیں کی جائے گی اور سرویلنس سرگرمیوں کے خاطر خواہ نتائج نہ دکھانے والے محکمے جوابدہ ہونگے۔یہ بات ڈپٹی کمشنرکیپٹن (ر)ندیم ناصر نے ڈسٹرکٹ ایمرجنسی رسپانس کمیٹی کے اجلاس میں انسداد ڈینگی اقدامات پر عملدرآمد کاجائزہ لیتے ہوئے کہی جس میں سی ای اوعدنان محمود نے اینٹی ڈینگی ٹیموں کی کارکردگی سے آگاہ کیا۔
اجلاس میں ڈسٹرکٹ ہیلتھ آفیسر ڈاکٹر عظمت عباس کے علاوہ ایجوکیشن،سوشل ویلفیئر، ماحولیات،سول ڈیفنس،لائیو سٹاک،انڈسٹریز،لوکل گورنمنٹ، لیبر، اوقاف، واسا،پی ایچ اے،پنجاب پولیس،ضلع کونسل،میونسپل کارپوریشن،میونسپل کمیٹیز اور دیگر محکموں کے افسران بھی موجود تھے۔ ڈپٹی کمشنر نے ہدایت کی کہ ڈینگی لاروا کی افزائش کے موافق مقامات کا بار بار سروے کریں اور ایسی جگہوں کو خشک اور صاف رکھنے کے لئے موثر اقدامات ہونے چاہیں۔انہوں نے ٹائر شاپس، کباڑخانوں،قبرستانوں،نرسریز کو بلا ناغہ چیک کرنے کی تاکید کی اور کہا کہ تمام محکموں کی اینٹی ڈینگی سرگرمیاں واضح نظر آنی چاہیں۔انہوں نے کہا کہ تحصیل ایمرجنسی رسپانس کمیٹیز کی میٹنگ میں متعلقہ محکمے اپنی حاضری کو یقینی بنائیں۔
Short Link: https://urdu.app.com.pk/urdu/?p=579560
