لاہور۔16مارچ (اے پی پی):قومی احتساب بیورو(نیب) لاہور میں اتوار کے روز بھی ایڈن متاثرین میں چیک تقسیم کرنے کا سلسلہ جاری رہا ۔ ڈائریکٹر جنرل نیب لاہور محمد احترام ڈار اور ان کی اہلیہ نے چیک وصولی کیلئے آنے والے متاثرین کو چیئرمین نیب کی طرف سے گلدستے پیش کئے اور تقسیم کے تمام مراحل کی ازخود نگرانی کی۔
چیئرمین نیب کی ہدایات پر ایڈن سکینڈل میں متاثرہ خواتین کی سہولت کیلئے نیب کی فیمیل آفیسرز بھی اتوار کو ڈیوٹی پر موجود رہیں۔ ڈی جی نیب لاہور اور ان کی اہلیہ نے نیب کی خواتین افسران کو چھٹی کے روز خدمات سرانجام دینے پر سراہا اور ان کی تعریف کی۔
اس موقع پر ڈی جی نیب لاہور نے کہا کہ نیب نے تین ایام میں ایڈن سکینڈل کے سینکڑوں متاثرین کو کروڑوں روپے مالیت کے چیک حوالہ کئے ہیں جبکہ تمام متاثرین کی سہولت کیلئے انہیں شٹل سروس کی فراہمی کا سلسلہ بھی جاری ہے، تاہم ایڈن سکینڈل کے تمام متاثرین کی آسانی کیلئے نیب لاہور نے اسٹامپ پیپر کی شرط بھی ختم کردی ہے۔
علاوہ ازیں ڈی جی نیب لاہور نے عید الفطر سے قبل ایک اور میگا سکینڈل میں اہم ریکوری اور متاثرین میں ڈوبی رقوم کی عید سے قبل ہی تقسیم کی خوشخبری بھی دی۔نیب لاہور میں چیک وصول کرنے والے ایڈن سکینڈل کے متاثرین نے اظہار خیال کرتے ہوئے کہا کہ نیب لاہور کی جانب سے اعلی سہولیات فراہم کی جا رہی ہیں جس پر چیئرمین اور ڈی جی نیب لاہور کے شکر گزار ہیں۔
متاثرہ شہری نے عیدالفطر سے قبل ڈوبی رقم کی برآمدگی پر نیب لاہور اور تمام انتظامیہ کیلئے نیک خواہشات کا اظہار کیا اور کہا کہ چھٹی کے روز چیک کی تقسیم سے متاثرین کے اپنے دفاتر اور کاروباری امور متاثر نہیں ہوتے یہ اہم سہولت دی گئی ہے۔دیگر متاثرین نے نیب لاہور کی موجودہ انتظامیہ کے اقدامات سے نیب لاہور کی سروس ڈیلیوری میں بہتری محسوس کرتے ہوئے نیب کے اقدامات کو سراہا۔
ڈی جی نیب لاہور نے متاثرین کو یقین دہانی کرواتے ہوئے کہا کہ ایڈن سکینڈل کے تمام 11,000 متاثرین کو 1 ارب 16 کروڑ کی مکمل ادائیگی تک نیب لاہور اپنے اقدامات جاری رکھے گا ۔
Short Link: https://urdu.app.com.pk/urdu/?p=573269