اسلام آباد۔9اگست (اے پی پی):خصوصی سرمایہ کاری سہولت کونسل( ایس آئی ایف سی )نے ڈی پی ورلڈ کے اشتراک سے ڈیجیٹل تجارت کے فروغ میں کلیدی کردار ادا کیا ہے،ایس آئی ایف سی کی کاوشوں سے ڈیجیٹل تجارت کے فروغ اور معاشی ترقی کے لیے موثر پلیٹ فارم فراہم کیا گیا ہے ۔
اس حوالہ سے پاکستان اور ڈی پی ورلڈ کے اشتراک سے دبئی میں زیرو کاسٹ ایکسپورٹ مارٹ کے تحت دبئی کی بندرگاہ جبل علی کے قریب ’’پاکستان مارٹ‘‘ کے نام سے میگاتجارتی مرکز قائم کیا جائے گا۔واضح رہے کہ ڈی پی ورلڈ پاکستانی برآمدکنندگان کے لیے تجارتی مرکز کی تعمیر کرے گا،ایکسپورٹ مارٹ سے برآمدکنندگان کی مصنوعات کو نمائش، ترسیل اورعالمی منڈی تک براہِ راست رسائی ملے گی ۔
اس اہم منصوبہ سے ٹیکسٹائل، گارمنٹس، سرجیکل اور خوراک سمیت دیگر شعبے مستفید ہوں گے۔ برآمدکنندگان کے ریلیف کے لیے فروخت سے قبل کوئی ٹیکس یا فیس لاگو نہ کرنے کا فیصلہ کیا گیا ہے۔ایس آئی ایف سی کے تعاون سے یہ اقدام عالمی سطح پر پاکستان کی مثبت شناخت متعارف کرائے گا۔
