آکلینڈ۔12مارچ (اے پی پی):نیوزی لینڈ کی مردوں کی کرکٹ ٹیم کے فاسٹ باؤلر بین سیئرز نے کاؤنٹی چیمپئن شپ 2025 کے سیزن کے لئے یارکشائر سے معاہدہ کیا ہے اور وہ ہیڈنگلے میں ووسٹر شائر کے خلاف سیزن کے اپنے دوسرے میچ کے لئے اپنی ٹیم یارکشائر کو دستیاب ہوں گے 27 سالہ بین سیئرز نے اپنی فاسٹ بائولنگ کی وجہ سے نیوزی لینڈ کو متاثر کیا ہے، جس میں 2024 میں آسٹریلیا کے خلاف اپنے واحد ٹیسٹ بھی شامل ہے۔
کرائسٹ چرچ میں کھیلے گئے اس ٹیسٹ میچ کی ایک اننگز میں بین سیئرز نے عمدہ بائولنگ کا مظاہرہ کرتے ہوئے 5 وکٹیں حاصل کیں تھی جبکہ دوسری اننگز میں 90 رنز کے عوض 4 وکٹیں حاصل کیں ۔ اس سے قبل انہوں نے 2021 میں بنگلہ دیش کے خلاف اپنا ٹی ٹونٹی ڈیبیو کیا تھا۔ہیڈنگلے میں ووسٹر شائر کے خلاف میچ میں ان کے ساتھ ان کے ساتھی نیوزی لینڈ کے تیز رفتار بائولر ول او رورک بھی شامل ہوں گے، جنہوں نے ٹی ٹونٹی بلاسٹ کے لئے معاہدہ کیا ہے، جبکہ کلب نے اپنے ہم وطن، اور یارکشائر کے سابق اوورسیز کھلاڑی، لوکی فرگوسن کے ساتھ موازنہ بھی کیا ہے۔
بین سیئرز نے کہا ہے کہ میں ہیڈنگلے میں یارکشائر کی نمائندگی کے لئے بے تابی سے منتظر ہوں ۔انہوں نے کہا کہ میں کاؤنٹی چیمپئن شپ 2025 کے سیزن میں عمدہ کھیل پیش کرتے ہوئے اپنی ٹیم کو فتوحات دلانے میں اہم کردار ادا کروں گا۔یارکشائر کے ہیڈ کوچ انتھونی میک گراتھ نے کہاہے کہ بین سیئرز ایک حقیقی محنتی کھلاڑی ہیں جن کے ٹیم میں شمولیت سے بائولنگ کا شعبہ مزید مضبوط ہوگا۔ ہیڈ کوچ نے کہا کہ ہمیں خوشی ہے کہ بین سیئرز نے معاہدے پر دستخط کئے ہیں اور اپریل میں ہیڈنگلے میں ان کا استقبال کرنے کے منتظر ہیں۔
Short Link: https://urdu.app.com.pk/urdu/?p=571424
