کاروباری لاگت میں کمی اور مالیات تک رسائی کاروباری شعبہ کےلئے انتہائی ضروری ہے، اشرف بھٹی

اسلام آباد۔3اگست (اے پی پی):آل پاکستان انجمن تاجران کے مرکزی صدر اشرف بھٹی نے کہا ہے کہ پاکستان کی کاروباری برادری مانیٹری پالیسی کمیٹی کے فیصلے سے پریشان ہے،معاشی ماہرین اور کاروباری افراد کی جانب سے تسلسل کے ساتھ یہ مطالبہ سامنے آرہا ہے کہ پالیسی ریٹ کو سنگل ڈیجٹ میں لایا جائے تاکہ معاشی سر گرمیوں کو تحرک مل سکے ۔

اتوار کو اپنے بیان میں انہوں نے کہا کہ پالیسی ریٹ زیادہ ہونے کی وجہ سے مقامی مارکیٹوں میں سرمائے کی قلت کے مسائل کا سامنا ہے ، رپورٹس کے مطابق خطے کےممالک کے مقابلے میں پاکستان میں پالیسی ریٹ زیادہ ہے جس کی وجہ سے معاشی سر گرمیاں عروج حاصل نہیں کر پا رہیں۔

انہوں نے کہا کہ پاکستان میں کاروبار کرنے کی لاگت میں کمی، سہولت اور مالی وسائل تک آسان رسائی ضروری ہے جس کےلئے پالیسی ریٹ میں کمی کی جانی چاہئے۔ انہوں نے مطالبہ کیا کہ پالیسی ریٹ کو مرحلہ وار کم کرنے کی بجائے فی الفور 6سے7فیصد کے سنگل ڈیجٹ میں لایا جائے ۔