فیصل آباد ۔ 05 جولائی (اے پی پی):ڈپٹی ڈائریکٹرپلانٹ پروٹیکشن، پیسٹ وارننگ اینڈ کوالٹی کنٹرول آف پیسٹی سائیڈز محکمہ زراعت فیصل آباد عامر رسول نے کہاکہ کاشتکار موجودہ موسمی حالات کو پیش نظر رکھتے ہوئے کماد کی فصل کو 15سے20دن کے وقفہ سے آبپاشی بھی کرتے رہیں جبکہ کاشتکاروں کو کماد کی فصل پر گھوڑامکھی کاحملہ روکنے اور اس کے تدارک کیلئے گھوڑامکھی کے دشمن طفیلی کیڑوں کی پرورش کو فروغ دینے کابھی مشورہ دیا گیا ہے
اور کہاگیاہے کہ ایسے کھیت جن میں طفیلی کیڑے وافر تعداد میں موجود ہوں وہاں سے طفیلی کیڑوں کے انڈوں اور کویوں والے پتے 6انچ لمبائی میں کاٹ لئے جائیں اور گھوڑا مکھی کے متاثرہ کھیتوں میں جہاں طفیلی کیڑے ہوں وہاں انہیں پتوں کے ساتھ لٹکا دیں۔
انہوں نے کہا کہ گھوڑامکھی کے دشمن طفیلی کیڑے گھوڑا مکھی کے خاتمہ میں انتہائی مؤثر و معاون ثابت ہوئے ہیں۔انہوں نے کہاکہ اگر کماد کی فصل پر کسی دیگر بیماری یا کیڑے کا حملہ مشاہدے میں آئے تو فوری طور پر ماہرین زراعت یا محکمہ زراعت کے فیلڈ سٹاف کی خدمات سے استفادہ یقینی بنایاجائے۔
Short Link: https://urdu.app.com.pk/urdu/?p=372477
