فیصل آباد۔ 31 اگست (اے پی پی):محکمہ زراعت نے کاشتکاروں کو مرچوں کی چنائی بروقت مکمل کرنے کی ہدایت کی ہے۔
ڈپٹی ڈائریکٹر محکمہ زراعت توسیع فیصل آبادچوہدری خالد محمودنے کہاکہ چونکہ مقررہ وقت پر چنائی نہ کرنے کے عمل سے فصل کو نقصان پہنچنے کا خدشہ ہوتاہے اس لیے اس ضمن میں کسی غفلت یا کوتاہی کا مظاہرہ نہ کریں ۔ انہوں نے کہاکہ چنائی کا عمل اس وقت شروع کریں جب مرچ اچھی طرح پک چکی ہو اور اس کا رنگ بھی مکمل طور پر سرخ ہو چکاہو۔
انہوں نے کہاکہ چنائی صبح یا شام کے ٹھنڈے اوقات میں کریں تاکہ پودے ٹوٹنے کا احتمال نہ رہے۔ انہوں نے کہاکہ مرچ کی چنائی ہفتہ عشرہ کے وقفے سے کرنے کے بعد مرچوں کو اکٹھا ڈھیر کی صورت میں رکھنے کی بجائے خشک اور صاف چٹائی پر احتیاط سے بکھیر دیں ۔ انہوں نے کہاکہ کاشتکار چنائی کے بعد کمزور اور بیماری سے متاثرہ مرچوں کو الگ کر دیں نیز مرچوں کو بارش یا آندھی سے بچانےکے لیے بھی ضروری اقدامات کریں تاکہ بہتر پیداوار کے ذریعے کاشتکاروں کو مالی منفعت حاصل ہوسکے۔
Short Link: https://urdu.app.com.pk/urdu/?p=384646
