فیصل آباد۔ 29 جولائی (اے پی پی):محکمہ زراعت نے خوردنی تیل کی ضروریات پوری کرنے کے لئے کاشتکاروں کو زیادہ سے زیادہ رقبہ پر زیتون کاشت کرنے کی ہدایت کی ہے۔
نظامت زرعی اطلاعات محکمہ زراعت فیصل آباد کے ترجمان نے کہا ہے کہ زیتون کی کاشت کو فروغ دے کر جہاں اربوں روپے کا قیمتی زرمبادلہ بچایاجاسکتاہے وہیں ملکی ضروریات پوری کرنے کے بعد اضافی پیداوار برآمد بھی کی جا سکتی ہے۔ انہوں نے کہا کہ زیتو ن کی کاشت کے لئے گرم و معتدل درجہ حرارت انتہائی موزوں ہے لہٰذا ایسے علاقے جہاں زیادہ سردی نہ پڑتی ہووہاں زیتون کو بآسانی کاشت کیاجاسکتاہے۔
انہوں نے کہاکہ زیتون میں کلیاں بننےکے لئے موسم سرما کے دوران روزانہ درجہ حرارت کااتار چڑھاؤ ایک سے 15 ڈگری سینٹی گریڈ ہونا ضروری ہے تاہم پھول بننے کے بعد سردی زیتون کی فصل کو متاثر کر سکتی ہے۔ انہوں نے کہاکہ کاشتکار زیتون کی کاشت بارے مزید رہنمائی کے لئے ماہرین زراعت یا محکمہ زراعت کے فیلڈ سٹاف کی خدمات سے بھی استفادہ کرسکتے ہیں۔
