سیالکوٹ۔23جون (اے پی پی):محکمہ زراعت پنجاب نےکاشتکاروں کو ماش کی کاشت فوری طور پر شروع کرکے وسط جولائی تک مکمل کرنے کی ہدایت کی ہے۔محکمہ زراعت کے ترجمان نے کاشتکاروں سے کہا کہ ماش کی کاشت کیلئے1سے 2 مرتبہ ہل چلا کر زمین کو سہاگہ دینا چاہیے اور اگر کھیت میں مڈھ وغیرہ موجود ہوں تو ڈسک بلو یا روٹاویٹر چلا کرسہاگہ دیا جاسکتاہے۔
انہوں نے بتایاکہ زیادہ بارش والے علاقوں میں 8کلوگرام اور دیگر علاقوں میں 10کلوگرام فی ایکڑ استعمال کرکے شاندار فیصل حاصل کی جاسکتی ہے۔ انہوں نے کہاکہ کاشتکار ڈرل کے ذریعے ماش کی کاشت کی صورت میں1فٹ کے فاصلے پر قطاریں بنائیں اور اس میں ماش کو کاشت کیاجائے۔ انہوں نے کہاکہ اگر ڈرل دستیاب نہ ہو تو اس صورت میں پور باندھ کر یا کیرا کے ذریعے بھی ماش کی کاشت کی جاسکتی ہے۔
انہوں نے بتایاکہ زیادہ بارش والے علاقوں میں کھیلیوں پر ماش کی کاشت انتہائی موزوں ثابت ہوئی ہے۔ انہوں نے کاشتکاروں کو ہدایت کی کہ وہ ماش کی فصل کیلئے کھاد کی مقدار کادرست تعین کرنے کیلئے زمین کا تجزیہ بھی ضرور کروائیں۔
انہوں نے کہاکہ اگر زمین کے تجزیئے کی سہولت موجود نہ ہو تو1بوری ڈی اے پی، آدھی بوری پوٹاشیم سلفیٹ یا ایک بوری ٹی ایس پی، آدھی بوری یوریا، آدھی بوری پوٹاشیم سلفیٹ یا1 بوری امونیم سلفیٹ، اڑھائی سے 3 بوری سنگل سپرفاسفیٹ، آدھی بوری پوٹاشیم سلفیٹ فی ایکڑ استعمال کی جاسکتی ہے۔
