فیصل آباد۔ 23 اگست (اے پی پی):ڈپٹی ڈائریکٹرپلانٹ پروٹیکشن،پیسٹ وارننگ اینڈ کوالٹی کنٹرول آف پیسٹی سائیڈزمحکمہ زراعت فیصل آباد ڈاکٹر چوہدری عامر رسول نے کہا کہ سبزیوں وپھلوں کو موسم گرما میں ایک سے دوسری جگہ منتقل کرنے کے دوران تازہ ہوا کی اشد ضرورت ہوتی ہے لہٰذاکاشتکارپھلوں و سبزیوں کو گلنے سڑنے سے بچانے کیلئے جیوٹ بیگز استعمال کریں۔
انہوں نے اے پی پی کو بتایاکہ بعض سبزیاں اور پھل ایسے ہوتے ہیں جنہیں ایک جگہ سے دوسری جگہ منتقل کرنے یا ان کے ذخیرہ کے دوران اگرانہیں تازہ ہوانہ ملے تو ان کی کوالٹی بری طرح متاثر ہوتی ہے اور ان کا ذائقہ بھی خراب ہو جاتاہے لیکن لاعلمی اور مناسب آگاہی نہ ہونے کے باعث کاشتکار ان موسمی سبزیوں اور پھلوں کی نقل و حمل اور ذخیرہ کیلئے پولی پراپلین یا پلاسٹک شاپنگ بیگز استعمال کرتے ہیں جن میں ہوا کا گزر اچھی طرح نہیں ہوتااس طرح اس میں موجود سبزیاں اور پھل گل سڑ جاتے ہیں جس کے باعث کاشتکاروں کومالی نقصان اٹھانا پڑتا ہے۔
انہوں نے بتایا کہ سبزیاں و پھل گلنے سے ان کے جراثیم اور جراثیموں کے انڈے پولی پراپلین بیگز میں جذب ہو جاتے ہیں اور جب انہی بیگز کو دوبارہ استعمال میں لایا جاتا ہے تو اس میں موجود جراثیم ایک بار پھر متاثرہ بیگ میں ذخیرہ کی گئی سبزیوں اور پھلوں پر حملہ کر کے اسے تباہ کر دیتے ہیں لہٰذا کاشتکار مالی نقصان سے بچنے کیلئے پولی پراپلین کے استعمال سے گریز کریں۔
Short Link: https://urdu.app.com.pk/urdu/?p=381727
