فیصل آباد۔ 30 ستمبر (اے پی پی):کاشتکاروں کو کپاس کے پھل کو گرنے سے بچانے کیلئے فوری زنک،بوران اور یوریاکا سپرے کرنے اورہفتے میں 2 بار کپاس کی فصل کی پیسٹ سکاؤٹنگ جاری رکھنے کا مشورہ دیا گیا ہے اور کہا گیا ہے کہ اگر کیڑوں کاحملہ نقصان کی معاشی حد تک ہو تو فوری طور پر محکمہ زراعت کے فیلڈسٹاف یا ماہرین زراعت کی مشاورت سے مناسب زہروں کاسپرے کیاجائے نیز نائٹروجن کی کمی کی صورت میں کپاس پر2کلو گرام یوریا فی ایکڑ کے حساب سے 100لیٹر پانی میں مکس کرکے اس کا سپرے کیاجاسکتاہے۔
نظامت زرعی اطلاعات محکمہ زراعت کے ترجمان نے کاشتکاروں کو آگاہ کیا کہ اگر کپاس کی فصل بڑھوتری کی جانب مائل ہو تو میپی کواٹ کلورائیڈ 100ملی لیٹر فی ایکڑ کے حساب سے سپرے کرنے کے بھی مثبت نتائج حاصل ہو سکتے ہیں۔ انہوں نے کہاکہ نمی کی وجہ سے رواں موسم کے دوران کپاس کی فصل پر سبزتیلے و لشکری سنڈی کاحملہ بڑھ جاتاہے لہٰذا کاشتکاروں کو اس جانب بھی توجہ مرکوز رکھنی چاہیے۔
Short Link: https://urdu.app.com.pk/urdu/?p=506824
