سیالکوٹ۔2ستمبر (اے پی پی):کاشتکار چقندر کی کاشت ستمبر کے آخر تک مکمل کر لیں ۔ ان خیالات کا اظہار سینئر فیلڈ آفیسرمحكمہ زراعت پسرور کامران باجوہ نے کاشتکاروں کے نام اپنے ایک پیغام میں کیا۔ انہوں نے کہا کہ کاشتکار چقندر کی فی ایکڑ بہترین پیداوار حاصل کرنے کیلئے چقندر کی کاشت کا عمل ستمبر کے آخر تک مکمل کر لیں۔انہوں نے بتایا کہ چقندر ایک انتہائی اہم، منافع بخش اور نقد آورفصل ہے۔
انہوں نے مزید کہا کہ زرعی تحقیقی اداروں کی کئی سالوں کی محنت، تجربات اور مشاہدات کے باعث چقندر کی فی ایکڑ پیداوار 7سو من سے بڑھ کر 12سو من تک پہنچ چکی ہے،اگر چقندر کی کاشت کے دوران جدید سائنسی طریقہ کاشت سے استفادہ کریں تو یہ پیداوارباآسانی 15سو من فی ایکڑ تک پہنچ سکتی ہے۔ انہوں نے کہا کہ کاشتکار چقندر کی کاشت کیلئے مزید معلومات و رہنمائی کیلئے ماہرین زراعت یا عملہ کی خدمات بھی حاصل کر سکتے ہیں۔
