اسلام آباد۔5جنوری (اے پی پی):پاکستان میں موجود اسلامی تعاون تنظیم کی قائمہ کمیٹی کامسٹیک اور یونیورسٹی آف لاہور نے مشترکہ طور پر بنگلہ دیش میں تعلیم اور پیشہ ورانہ ترقی میں معاونت کے لیے اپنے سکالرشپ و فیلوشپ پروگرام برائے بنگلہ دیش کا اعلان کیا ہے۔ اس پروگرام کے تحت بنگلہ دیش سے تعلق رکھنے والے طلبا ، محققین، سائنسدانوں اور تکنیکی عملے کے لیے خواہ وہ کسی بھی ملک میں موجود ہوں ، پاکستان میں مکمل ڈگری اور مختصر مدت کی تربیت کے لیے سکالرشپس، فیلوشپس مہیا کی جائیں گی۔میڈیا کوآرڈینیٹر کامسٹیک کی جانب سے اتوار کو جاری بیان کے مطابق یہ پروگرام الائیڈ ہیلتھ سائنسز، انجینئرنگ و ٹیکنالوجی، سائنسی مضامین، سوشل سائنسز، مینجمنٹ سائنسز، آرٹس و آرکیٹیکچر
۔ انفارمیشن ٹیکنالوجی، فارمیسی اور ادب کے شعبوں کا احاطہ کرے گا۔ اپنے بیان میں کوآرڈینیٹر جنرل کامسٹیک پروفیسر ڈاکٹر محمد اقبال چوہدری نے پروگرام کی اہمیت پر زور دیتے ہوئے کہا کہ یہ اقدام او آئ سی رکن ممالک کے درمیان سائنسی اور تکنیکی تعاون کو فروغ دینے کے لیے کامسٹیک کے غیر متزلزل عزم کی عکاسی کرتا ہے۔ یہ بنگلہ دیش کے نوجوان سائنسدانوں و محققین کو کو ایک پلیٹ فارم مہیا کرے گا جس سے دونوں ممالک کے بیچ علمی و سائنسی تعاون کا نیا باب کھلے گا انہوں نے پروگرام کے لیے تعاون کرنے پر یونیورسٹی آف لاہور کے بورڈ آف گورنرز کے چئیرمین اویس روف کا شکریہ ادا کیا۔اسکالرشپ پروگرام کے لیے عمر کی حد 22 سے 45 سال رکھی گئ ہے جبکہ اسکالرشپ حاصل کرنے والے طلبہ کو ٹیوشن فیس-
دو طرفہ سفری اخراجات، مقامی ٹرانسپورٹ، ماہانہ اعزازیہ، محققین اور تربیت حاصل کرنے والوں کے لیے مفت رہائش بھی دی جائے گی۔ پروگرام کے لیے درخواستیں جمع کروانے کی آخری تاریخ یکم مارچ 2025 ہے۔یہ تمام اسکالرشس و فیلوشپس پاکستان میں موجود یونیورسٹی آف لاہور کے لیے ہوں گی، یونیورسٹی آف لاہور کا شمار پاکستان سمیت دنیا کی بہترین جامعات مییں ہوتا ہے جو حال ہی میں کیو ایس رینکنگ میں دنیا کی پہلی 500 بہترین جامعات میں شمار کی گئ ہے۔ کامسٹیک کی جانب سے پاکستان سمیت او آئی سی کے دیگر رکن ممالک میں سائنسی و تکنیکی تعاون کے فروغ کے لیے کئ اقدامات اٹھائے گئے ہیں جس سے سائنسی تعاون کی ترویج کے ساتھ ساتھ ان ممالک کے نوجوان سائنسدانوں کا وسیع پلیٹ فارم مہیا کیا جارہا ہے
جس کے تحت وہ اپنے ملک سے باہر جاکر بھی جدت اور ترقی میں اپنا حصہ ڈال رہے ہیں۔ یہ پروگرام کامسٹیک کوآرڈنیٹر جنرل پروفیسر ڈاکٹر محمد اقبال چوہدری اور چیئرمین بورڈ آف گورنرز یونیورسٹی آف لاہور اویس روف کی پاکستان اور او آئی سی رکن ممالک کے مابین تعاون اور سائنس کی ترویج کے کیے کوششوں کا احاطہ کرتا ہے
