اسلام آباد۔31مئی (اے پی پی):رکن قومی اسمبلی انجم عقیل خان نے کہا ہے کہ یوم تکبیر پاکستان کے لئے ایک بڑی اہمیت کا دن ہے ، اس دن ہونے والے کامیاب جوہری دھماکوں نے نہ صرف پاکستان کی خودمختاری بلکہ اسکے دفاع کو بھی ناقابل تسخیر بنادیا، اس جر أت مندانہ اقدام نے پاکستان کی ایک ذمہ دار جوہری طاقت کی حیثیت سے پوزیشن کو مستحکم کردیا جو خطے میں امن و استحکام کو برقرار رکھنے کے لئے پرعزم ہے۔جمعہ کو اسلام آباد چیمبر آف کامرس اینڈ انڈسٹری میں یوم تکبیرکے سلسلے میں منعقدہ تقریب سے خطاب کرتے ہوئے انہوں نے کہا کہ ان تمام لوگوں کی قربانیوں کا احترام کرنا بھی ضروری ہے جنہوں نے پاکستان کے فضیلت اور کامیابی کی طرف سفر کی تشکیل میں اپنا کردار ادا کیا ہے۔انجم عقیل خان نے کہا کہ اس دن ہمیں ، خاص طور پر نوجوانوں اور خواتین کو تجدید عہد کرنا ہوگی کہ وہ ملک کو ترقی و خوشحالی کی راہ پر گامزن کرنے کے لئے جدید ترین مہارتوں سے آراستہ ہوں گے۔
انہوں نے مزید کہا کہ موجودہ قیادت دن رات کام کر رہی ہے تاکہ ملک کو غیر ملکی سرمایہ کاری ، خاص طور پر سعودی عرب اور متحدہ عرب امارات سے سرمایہ کاری کو راغب کیا جاسکے تاکہ اس کو خود کفیل حالت بنایا جاسکے۔ممبر قومی اسمبلی فرح اکبر نے اس دن کی اہمیت کو اجاگر کرتے ہوئے کہا کہ جوہری طاقت کے بعد اسے معاشی طاقت بنانے کے لئے کاروباری برادری کی حکومت کو تعاون کی بہت ضرورت ہے۔ انہوں نے کہا کہ ریاست کی باگ ڈورمخلص اور قابل قیادت کے ہاتھ میں ہے ، انشاء اللہ ہم بہتر مستقبل کے لئے موجودہ صورتحال سے باہر آسکیں گے۔سینئر تاجر اور سیکرٹری جنرل یونائیٹڈ بزنس گروپ ظفر بختاوری نے کہا کہ بڑھتے ہوئے بیرونی دباؤ کی مزاحمت کرتے ہوئے ، اس وقت کے وزیر اعظم نواز شریف نے پوری دنیا کے سامنے اپنی طاقت کا مظاہرہ کیا اور اسلامی دنیا میں واحد جوہری طاقت ہونے کا اعزاز حاصل کیا۔ انہوں نے مزید کہا کہ اقوام کی زندگی میں کچھ لمحے ایسے ہیں جب کوئی فیصلہ ان کی تقدیر کو تبدیل کرتا ہے اور 28 مئی کو پاکستان کا دن تھا۔انہوں نے ان تمام شخصیات کو بھرپور خراج تحسین پیش کیا جنہوں نے ملک کو ایٹمی قوت بنانے میں اہم کردار ادا کیا جس میں مرحوم ذوالفقار علی بھٹو ، ڈاکٹر عبد القدیر خان ، میاں نواز شریف اور دیگر شامل ہیں۔انہوں نے مزید کہا کہ ہم پر یہ ذمہ داری عائد ہوتی ہے کہ ہم تمام سیاسی اختلافات کو نظرانداز کرکے اور پاکستان کو حقیقی معنوں میں ایک عظیم ملک بنانے کے اپنے عہد کی تجدید کرکے موجودہ حکومت کے ساتھ کھڑے ہوں۔
آئی سی سی آئی کے ایگزیکٹو ممبر اختر عباسی ، گروپ لیڈر بلیو ایریا یوسف راجپوت ، سابق سینئر نائب صدر جمشید اختر شیخ نے اپنی تقریروں میں قومی ہیروز کو اس اعزاز کے حصول کے لئے انکی جدوجہد کے لئے بھرپور خراج تحسین پیش کیا۔آئی سی سی آئی کے ایگزیکٹو ممبر رضوان چھینہ نے یہ کہتے ہوئے شکریہ ادا کیا کہ کاروبار میں آسانی کے لئے کاروبار دوست ماحول کی اشد ضرورت ہے اور حکومت کو لازمی طور پر مطلوبہ سہولیات کو کاروباری برادری تک بڑھانا ہوگا۔اس موقع پر پروین درانی ، چوہدری محمد نعیم ، شبیر ملک ، خالد چوہدری ،چوہدری عرفان ، محسن ملک ، چوہدری عرفان ،منیزے ماجد، ناصرہ علی طہماس بٹ اور چوہدری بابر بھی موجود تھے۔
