کراچی۔ 21 دسمبر (اے پی پی) پاک فضائیہ اور پیپلز لبریشن آرمی ائیر فورس (پی ایل اے اے ایف) کے درمیان ہونے والی مشترکہ عالمی فضائی مشق شاہین -VII پاکستان کے ایک آپریشنل ائیر بیس پر اختتام پذیر ہوئی۔ دو ہفتوں پر محیط اس فضائی مشق کے اختتام پر شاندار تقریب کا انعقاد کیا گیا۔ تقریب کے مہمان خصوصی ڈپٹی چیف آف دی ائیر سٹاف (آپریشنز) ائیر مارشل محمد حسیب پراچہ تھے۔ عوامی جمہوریہ چین کے دفاعی اتاشی میجر جنرل چن ونرانگ بھی اس موقع پر موجود تھے۔ دونوں ممالک کے اعلی عہدیداران کو اس مشق پر ایک تفصیلی بریفنگ دی گئی۔ جمعہ کو جاری کردہ اعلامیہ کے مطابق ائیر مارشل محمد حسیب پراچہ نے اس مشترکہ مشق کی اہمیت پر گفتگو کرتے ہوئے دونوں فضائی افواج کے افراد کو مشق کے شاندار انعقاد پر سراہا۔ میجر جنرل چن ونرانگ نے اپنے خطاب میں بہترین روایتی میزبانی اور ایک دوسرے کے تجربات سے مستفید ہونے کا موقع فراہم کرنے پر پاک فضائیہ کی اعلیٰ قیادت کا شکریہ ادا کیا۔ قبل ازیں مشترکہ فضائی مشق کے اختتام پر (Distnguished Visitors’ Day) منایا گیا۔ اس تقریب میں پاک فضائیہ کے جنگی ہیروز، پیپلز لبریشن آرمی ائیر فورس کے اعلیٰ عہدیداران، چین کے سفارتکاروں کے علاوہ حاضر سروس اور ریٹائرڈ افسران شامل تھے۔ معزز مہمانوں نے مشق کے معائنہ سیل کا دورہ کیا اور مشق کے انعقاد کے طریقہ کار کا مشاہدہ کیا۔ بعد ازاں مہمانوں نے پاک فضائیہ اور چینی فضائیہ کے جدید لڑاکا طیاروں اور معاون عناصر کی فضائی مشق ملاحظہ کی۔ اس مشق کا بنیادی مقصد فضائی افواج کو حقیقی جنگی ماحول میں تربیت فراہم کرکے ان کی عملی تربیت میں اضافہ کرنا ہے۔ پاک فضائیہ دنیا کی بہترین اور دوستانہ فضائی افواج کے ساتھ مشقوں میں شریک ہوتی ہے جس سے پاک فضائیہ کے افراد کو غیر معمولی تجربہ حاصل ہوتا ہے اور ان کی پیشہ ورانہ صلاحیتوں میں گرانقدر اضافہ ہوتا ہے۔
Short Link: https://urdu.app.com.pk/urdu/?p=127202
