اسلام آباد۔25دسمبر (اے پی پی):
وزیراعظم محمدشہبازشریف نے کہاہے کہ کرسمس کے موقع پر پاکستان کو مذہبی رواداری اور بھائی چارے کی مثال بنا کر امن کا گہوارہ بنانے اور ملک کو مشکلات سے نکالنے کیلئے اپنا کردار ادا کرنے کا عزم کرنا چاہیے، کرسمس کا تہوار آفاقی محبت و اخوت، برداشت اور ایثار کا درس دیتا ہے جو کسی بھی معاشرے کو ترقی کی راہ پر گامزن کرنے میں کلیدی کردار ادا کرتا ہے، اقوامِ عالم کو حضرت عیسی کے محبت کے پیغام کو مشعلِ راہ بنا کر نفرت کو ہمیشہ کیلئے ختم کرنا ہوگا تاکہ دنیا امن کا گہوارہ بن سکے، آئینِ پاکستان اقلیتوں کو خصوصی تحفظ فراہم کرتا ہے۔ وزیراعظم نے یہ بات کرسمس کے موقع پراپنے ایک پیغام میں کہی ہے جو آج (اتوارکو) پاکستان سمیت پوری دنیا میں منایا جارہاہے۔
وزیراعظم نے اپنے پیغام میں پاکستان سمیت پوری دنیا کے مسیحی بہن بھائیوں کو کرسمس 2022 کی خوشیوں کی مبارک دیتے ہوئے کہاہے کہ کرسمس کا تہوار آفاقی محبت و اخوت، برداشت اور ایثار کا درس دیتا ہے جو کسی بھی معاشرے کو ترقی کی راہ پر گامزن کرنے میں کلیدی کردار ادا کرتا ہے۔ پیغمبرِ خدا حضرت عیسی علیہ السلام نے انسانیت کے دکھوں پر مرہم رکھا اور اللہ تعالی کے پیغام کو پوری انسانیت تک پہنچایا۔ امن، بھائی چارہ، رواداری اور برداشت کا درس دیتے ہوئے حضرت عیسی علیہ سلام نے پوری انسانیت کی دنیاوی و اخروی زندگی سنوار دی۔
آپ کی اخلاقی تعلیمات اور راہنمائی ہم سب کے لئے مشعل راہ ہیں۔وزیراعظم نے کہاکہ اکیسویں صدی کے انسان کو حضرت عیسی علیہ السلام کے انسانی ہمدردی، محبت، رواداری اور بھائی چارے کے پیغام پر عمل کی ضرورت ہے، پوری دنیا میں گزشتہ کچھ دہائیوں میں مذہبی عدم برداشت کی لہر نے زور پکڑا ہے جس کے تدارک کیلئے بنی نوع انسان کو مذاہب کے بھائی چارے اور مذہبی رواداری کے پیغام پر عملدرآمد کی ضرورت ہے، عالمی سطح پر اقوامِ عالم کو حضرت عیسی علیہ السلام کے محبت کے پیغام کو مشعلِ راہ بنا کر نفرت کو ہمیشہ کیلئے ختم کرنا ہوگا تاکہ دنیا امن کا گہوارہ بن سکے۔
انہوں نے کہاکہ تاریخ گواہ ہے کہ پاکستان کی مسیحی برادری نے ملک کی تعمیر و ترقی، ملکی دفاع، عدلیہ الغرض ہر شعبے اور علم و عمل کے ہر میدان میں اپنا مثبت کردار ادا کیا، پاکستان کی بقا کی خاطر مسیحی برادری کی قربانیاں ناقابلِ فراموش ہیں۔ وزیراعظم نے کہاکہ قائدِ اعظم محمد علی جناح کے پاکستان میں ہر شخص کو مکمل مذہبی آزادی حاصل ہے، آئینِ پاکستان اقلیتوں کو خصوصی تحفظ فراہم کرتا ہے جہاں نہ صرف ان کو برابری کے حقوق دیئے گئے ہیں بلکہ ان کو عبادت کی مکمل آزادی اور ان کی عبادت گاہوں کو تحفظ فراہم کیا گیا ہے۔
وزیراعظم نے کہاکہ پاکستان اس وقت تاریخ کے ایک مشکل دور سے گزر رہا ہے جہاں ہم سب کو ایک قوم بن کر کر اس کی ترقی و خوشحالی کیلئے شبانہ روز محنت کرنی ہے، یہ ملک ہم سب کا ہےآئیں، کرسمس کے موقع پر ہم پاکستان کو مذہبی رواداری اور بھائی چارے کی مثال بنا کر امن کا گہوارہ بنائیں اور اس کو ان مشکلات سے نکالنے کیلئے اپنا کردار ادا کریں۔ پاکستان پائندہ باد
Short Link: https://urdu.app.com.pk/urdu/?p=343159
