اسلام آباد۔16مئی (اے پی پی):وفاقی وزیر برائے ماحولیاتی تبدیلی سینیٹر شیری رحمان نے کہا ہے کہ کرہ ارض کے درجہ حرارت میں اضافے کے رجحان اور ماحولیاتی بحران سے نمٹنے کے لیے وقت کے خلاف دوڑ میں عوامی اور سیاسی عزم دونوں کی ضرورت ہے۔
ان خیالات کا اظہار انہوں نے آسٹرین ورلڈ سمٹ 2023 میں "ہمارے پاس اپنے آب و ہوا کے اہداف تک پہنچنے کی طاقت ہے” کے عنوان سے پینل بحث کے دوران ورچوئل خطاب کرتے ہوئے کیا ۔ آسٹریا کے وفاقی وزیر برائے موسمیاتی عمل، ماحولیات، توانائی، انوویشن اینڈ ٹیکنالوجی لیونور گیوسلر اور کابینہ سیکرٹری برائے امور خارجہ اور ثقافت سکاٹ لینڈ انگس رابرٹسن نے بھی مباحثے میں شرکت کی۔ شیری رحمان نے کہا کہ موسمیاتی تبدیلی کے خطرے سے دوچار ممالک میں لچک پیدا کرنے کے لیے کلائمیٹ فنانس تک رسائی کو بڑھانا بہت ضروری ہے۔
انہوں نے کہا کہ ہمیں عالمی سطح پر نقصان اور ضیاع کے فنڈ اور اڈاپٹیشن فنڈ کے بارے میں واضح سمجھ کی ضرورت ہے۔ بدقسمتی سے ایڈاپٹیشن فنڈ، برسوں سے موجود ہونے کے باوجود بہت کم اور غیر موثر ہے۔ وفاقی وزیر نے کہا کہ ہمیں اس بات کو یقینی بنانا چاہیے کہ نقصان اور ضیاع کا فنڈ، جس نے موسمیاتی تبدیلی کی کانفرنسوں کے کثیر الجہتی عمل پر اعتماد بحال کیا ایک گھوسٹ فنڈ نہ بن جائے۔ ان فنڈز کو اپنے مقصد کو پورا کرنے کے لیے سرمایہ کاری کے قابل اعتماد ذرائع کی ضرورت ہوتی ہے اور تبدیلی لانے کے لیے، ہمیں کثیر الجہتی ترقیاتی بینکوں اور بین الاقوامی مالیاتی ڈھانچے میں اصلاحات کے لیے تخلیقی حل کی ضرورت ہوتی ہے۔
انہوں نے کہا کہ موجودہ بریٹن ووڈز سسٹم موسمیاتی بحران سے نمٹنے کے لیے ناکافی ہے اور مالی وسائل کی کمی ایک اہم رکاوٹ ہے۔ شیری رحمان نے کہا کہ کاپ سسٹم کو بڑے کاروباریوں کو مذاکرات کی میز پر لا کر ان کی شمولیت پر بھی غور کرنا چاہیے، کیونکہ ان کے پاس قیادت، فنڈنگ، اور اخراج میں کمی کے حل موجود ہیں جو ضروری تبدیلیوں میں حصہ ڈال سکتے ہیں۔ پاکستان میں موسمیاتی تبدیلیوں کے اثرات سے متعلق ایک سوال کے جواب میں وفاقی وزیر شیری رحمان نے کہا کہ ہم وقت کے خلاف بقا کی دوڑ میں ہیں، یہ ہماری زندگی میں انتخاب کے طریقہ کار کو تبدیل کر رہا ہے۔
انہوں نے کہا کہ اپنے لوگوں کی حفاظت ایک فوری ترجیح کے طور پر ابھری ہے، خاص طور پر جب ہم نے اپنے ملک کا تقریباً ایک تہائی حصہ پانی کے اندر ڈوبا ہوا دیکھا ہے۔ پاکستان کے لیے 2022 کے بعد، ہم کمزوروں کو جمع شدہ قرضوں اور موسمیاتی تنائو کی وجہ سے ہونے والے نقصانات دونوں کے بوجھ تلے دبنے سے روکنے کی جنگ میں ہیں۔ ان حالات میں کمزوری ان لوگوں کے لیے موت کی سزا ہو سکتی ہے جو خطرے کے دائرے میں رہتے ہیں۔ انہوں نے کہا کہ موسمیاتی تبدیلی ایک وجودی خطرہ بن گئی ہے اور اس کے تدارک کے لیے اخراج کو روکنے اور اثرات کو کم کرنے کے لیے ہر ایک کی اجتماعی کوششوں کی ضرورت ہے۔
ترقی پذیر ممالک کے فوری مسائل اور مطالبات کے بارے میں بات کرتے ہوئے وفاقی وزیر نے کہا کہ 2022 کے بڑے سیلاب نے ہماری توجہ موافقت کو ترجیح دینے کی طرف مبذول کر دی ہے۔ کمزور ممالک کے لیے موسمیاتی تبدیلیوں کی وجہ سے بڑھتی ہوئی غیر متوقع صلاحیت اور بیرونی دھچکوں کے مطابق ڈھالنا بہت ضروری ہے۔ مزید برآں بین الاقوامی برادری کو آب و ہوا کے خطرے سے دوچار ممالک میں کمیونٹیز کی تعمیر نو اور ان کی لچک کو یقینی بنانے کے لیے ضروری سطح پر موسمیاتی فنانسنگ اور موافقت کے لیے فنڈز مختص کرنا چاہیے۔ ہمارے معاشروں میں لچک اور موافقت پیدا کرنا نہ صرف بقا کے لیے بلکہ آنے والے کل کو ایک بہتر مقام تک پہنچانے کے لیے بھی ضروری ہے۔
