کشمیری بہنوں بھائیوں سے اظہار یکجہتی کیلئے پوری قوم اکھٹی ہے،کمشنرملتان

ملتان۔5فروری (اے پی پی):کمشنرملتان ڈاکٹر ارشاد احمد نے کہا ہے کہ ہر پاکستانی کا دل کشمیریوں کے ساتھ دھڑکتا ہے۔ کشمیری بہنوں بھائیوں سے اظہار یکجہتی کیلئے پوری قوم اکھٹی ہے۔ان خیالات کااظہارانہوں نے یوم یکجتی کشمیر کے موقع پر کشمیری بھائیوں سے اظہارِ یکجہتی کیلئے ضلعی انتظامیہ کے زیر اہتمام رضا ہال میں مرکزی سیمینار سے خطاب کرتے ہوئے کیا۔

اس موقع پر ڈپٹی کمشنر عامر کریم خاں اور پارلیمانی سیکرٹری برائے انفارمیشن و رکن کشمیر کمیٹی ندیم قریشی سمیت ضلعی حکام اور سول سوسائٹی کے نمائندگان بھی موجودتھے۔ سیمینار میں پاکستان اور کشمیر کے قومی ترانے بھی بجائے گئے اور کشمیر کی آزادی کیلئے دعا بھی کرائی گئی۔ ڈاکٹر ارشاد احمدنے مزید کہا کہ 5فروری بھارتی وحشیانہ چہرے کو دنیا کے سامنے عیاں کرنے کا دن ہے کیونکہ کشمیر جنت نظیر وادی کو مودی سرکار نے دنیا کی بدترین جیل میں بدل دیا۔

سیمینار سے خطاب کرتے ہوئے ڈپٹی کمشنر عامر کریم خاں نے کہا کہ انسانی حقوق کی پامالی کرکے بھارت نے مکروہ مثال قائم کی جس کی جتنی مذمت کی جائے کم ہے ۔انہوں نے کہا کہ بھارتی مظالم کے خلاف پوری قوم اپنے بھائیوں کے ساتھ کھڑی ہے۔خطے میں امن کیلئے عالمی برادری اپنا کردار ادا کرے۔

تقریب سے خطاب کرتے ہوئے پارلیمانی سیکرٹری برائے انفارمیشن ندیم قریشی نے کہا کہ پاکستان مسئلہ کشمیر کا پرامن اور دیر پا حل چاہتا ہے۔عالمی برادری کی اس خطے کے سنگین مسئلے پر خاموشی افسوناک ہے۔انہوں نے کہا کہ شہداءکا خون پکار پکار کر بھارتی ظلم کو بے نقاب کررہا ہے وہ دن دور نہیں جب پاکستان اور کشمیر ایک دھرتی کہلائیں گے۔بعد ازاں کشمیریوں سے اظہار یکجہتی کے لئے کمشنر ڈاکٹر ارشاد احمد کی صدارت میں رضا ہال سے چوک کچہری تک ریلی بھی نکالی گئی۔

Short Link: https://urdu.app.com.pk/urdu/?p=294043