اسلام آباد۔17اکتوبر (اے پی پی):وفاقی وزیر برائے امور کشمیر، گلگت بلتستان و سیفران انجینئر امیر مقام نے کہا ہے کہ کشمیر پاکستانیوں کے دلوں میں بستا ہے،27 اکتوبر کو یوم سیاہ کے موقع پر واضح پیغام دیا جائے گا۔
یہاں جاری بیان کے مطابق جمعرات کو امیر مقام کی زیر صدارت 27 اکتوبر یوم سیاہ کے حوالے سے جائزہ اجلاس منعقد ہوا۔اس موقع پر وزیر امور کشمیر وگلگت بلتستان انجینئر امیر مقام نے کہا کہ کشمیر پاکستانیوں کے دلوں میں بستا ہے،27 اکتوبر کو یوم سیاہ کے موقع پر واضح پیغام دیا جائے گا۔
وفاقی وزیر انجینئر امیر مقام نے کہا کہ بھارت نے مقبوضہ کشمیر پر جابرانہ قبضہ کر رکھا ہے جسے کشمیری عوام نے مسترد کر دیا ہے،مقبوضہ جموں کشمیر کے معاملے پر آل پارٹیز کانفرنس ہونی چاہیے۔
انجینئر امیر مقام نے کہا کہ پاکستان اپنے کشمیری بھائیوں اور بہنوں کی غیر متزلزل حمایت جاری رکھے گا،کشمیریوں کی آواز پوری دنیا تک پہنچائی جائے گی اور پاکستانی قوم مسئلہ کشمیر کے منصفانہ حل تک چین سے نہیں بیٹھے گی، یہ ہمارا قومی فریضہ ہے اور مسئلہ کشمیر زندہ ہے اور آزادی تک ہمارے دلوں میں زندہ رہے گا،پاکستان اقوام متحدہ کی سلامتی کونسل کی قراردادوں کے مطابق حق خودارادیت کے حصول تک کشمیری بھائیوں کی سیاسی، اخلاقی اور سفارتی حمایت جاری رکھے گا۔
وفاقی وزارتوں، صوبائی حکومتوں، گلگت بلتستان اور آزاد جموں و کشمیر حکومتوں کے نمائندوں نے وفاقی وزیر کو یوم سیاہ کی تیاریوں سے متعلق بریفنگ دی۔کل جماعتی حریت کانفرنس کے کنوینر غلام محمد صفی نے کشمیریوں سے اظہار یکجہتی کو جہاد قرار دیا۔ اقوام متحدہ کی جنرل اسمبلی میں وزیراعظم شہباز شریف کی تقریر اور مسئلہ کشمیر کو اجاگر کرنے پر ان کو سراہا۔غلام محمد صفی نے کہا کہ کل جماعتی حریت کانفرنس کے نمائندے ملک بھر اور آزاد جموں کشمیر میں یوم سیاہ کی ریلیوں میں شرکت کریں گے۔
Short Link: https://urdu.app.com.pk/urdu/?p=514169
