اسلام آباد۔28دسمبر (اے پی پی):پاکستان کے نام ور فن کار، کلاسیکی موسیقی اور گائیکی کے استاد چھوٹے غلام علی خان کی برسی 29 دسمبر کو منائی جائے گی۔ استاد چھوٹے غلام علی خان کا تعلق قصور کے ایک ایسے گھرانے سے تھا جو موسیقی اور گائیکی کے لیے مشہور تھا۔استاد چھوٹے غلام علی خان 1910ء میں پیدا ہوئے تھے۔ موسیقی کی ابتدائی تربیت اپنے والد میاں امام بخش سے حاصل کی جو دھرپد انداز گائیکی میں اختصاص رکھتے تھے۔ استاد چھوٹے غلام علی خان خیال، ترانہ، ٹھمری، دادرا اور غزل سبھی یکساں مہارت سے گاتے تھے۔
انھوں نے کلاسیکی موسیقی کو پاکستان میں فروغ دینے اور اس کی تربیت کے لیے بھی کام کیا۔ وہ اس حوالے سے لاہور آرٹس کونسل سے وابستہ رہے جہاں موسیقی کی تربیت کے لیے اپنی اکیڈمی قائم کی تھی۔چھوٹے غلام علی خان کے شاگردوں میں شاہدہ پروین اور بدرالزماں، قمر الزماں کے نام نمایاں ہیں۔حکومتِ پاکستان نے 1985ء میں انھیں صدارتی تمغہ برائے حسن کارکردگی سے بھی نوازا۔پاکستان میں موسیقی اور گائیکی کے فن میں نمایاں حیثیت کے حامل استاد چھوٹے غلام علی خان 29 دسمبر 1986ء کو لاہور میں وفات پا گئے
اور میانی صاحب کے قبرستان میں سپرد خاک ہوئے۔ ان کی برسی کے موقع پر مختلف تقریبات میں ان کے مداح انہیں خراج تحسین پیش کریں گے۔
Short Link: https://urdu.app.com.pk/urdu/?p=540254
